星期六同 JOANNA 去左 WILD DAY OUT，今次主要都係陪 JOANNA 去，因為佢想睇陶吉吉ma！
我地十二點就到，所以等到十二點半就可以入場，仲俾我地入到最前同最中間個位。跟住我地就在會場中四圍行，跟住又搵位坐低食野，然後就等等等。(因為唔俾離開會場)
我地等到好悶，四圍咁望，跟住就係咁影相。我發現四圍既人都係影緊相，你話大家等到幾悶先得架！
到真係正式開場既時候已經係四點幾lu！我發覺自己真係老餅得很，d歌星、樂隊係乜水我好多都唔識，而我四圍既後生仔女就係咁叫、係咁跳，佢地既叫聲差d震穿我隻耳膜！救命呀！
而我覺得全場最正既當然係陶喆既表演lar！佢唱得又好，又識帶動氣氛！正！
盧巧音都唔錯，佢上次在Zarahn的演唱會中唔識唱既歌，今次唱得好好，果然肯努力呀！當然lar！如果Zarahn有黎，我實會話佢地係最正架！haha~~~
另外，令我印象最深刻就係有隊叫飛輪海既樂隊，佢地係幾個後生仔，d靚妹好鍾意，見到佢地上台，跳跳舞，拋下媚眼，就係咁大叫，而隔離d男仔就當然有點不是味兒。
係佢地唱唱下歌既時候，播緊既碟居然跳線。噢！原來係"咪"咀架！台下的人呆左一呆，跟住班男仔就鬼殺咁嘈，叫佢地下台，你估佢地係陳水扁咩！認真搞鬼！不過呢幾個後生仔，做左一樣野黎維護自己既尊嚴，就係即刻清唱一段，表示只係機件故障，自己係唱得之人咁話！幾識執生呀！佢地咁做我又覺得ok喎！我幾欣賞！
仲有仲有呀關淑儀，佢一出黎著就好似冇著褲咁(應該係著左條超短熱褲)，我隔離d男仔忍唔住講左句：嘩！四仔呀！好搞笑！其實呢樣野唔係最奇，最奇係佢覺得自己唱得唔夠好，要唱多次，咁都唔緊要，佢居然話係d工作人員亂咁擺d歌，搞到佢唱得唔好。噢！如果你好熟d歌，請問你駛乜睇歌詞呢？我見咁多個表演單位都冇人睇歌詞架！佢咁講我即刻冇晒mood，跟住我就頂佢唔住，坐低出工作紙。呀關小姐，你認真厲害！
