Sunday 02nd January 2005 10:48:11 PM
 今朝起身勁鬼凍，差d唔想起身…
因為琴晚我聽收音機聽到一點幾…聽完森美移動同埋無聊既PatPat Leo<聽左少少>之後就訓…訓得唔係好好，半睡半醒。
今朝去陳志強堂，都話架啦~佢等左今日好耐，終於可以講明年會考…=.="不過又的確係，06年考，今日係05年…上堂講既野都可以話係舊年講的…今日又比佢串，唔鬼記得做功課，無奈=.="
不過咁，講講下，時間真係好快，出年就會考…
放學之後就走人，見到83K唔上啦，都追唔切…
所以等小巴，通常係晏就<大約一兩點>等小巴，大會堂果度d小巴一定少，因為全部都走私牌返黃泥頭/廣源，所以係好運等小巴，一定有位坐兼特快<行沙田圍路>，通常都係五分鐘就返到屋企，起碼快一半時間…今日上小巴，等兩個客，另一名是菲律賓人<應該係>，司機問我地邊度落，我話廣源，另外果名菲律賓人就話：「Cityone」。司機聽到以為佢講「Sun tin wai」，佢地差d雞同鴨講，其實個菲律賓人識講廣東話，不過見到講緊手提，應該係慣左講英文…結果我同司機講話佢係第一城落…最後就以快速飛返去第一城，但最後經過愉翠上左幾個乘客之後，總共行車時間用左十多分鐘，很慢唷=.="~不過由呢一刻開始，又覺陳志強講野係岩，英文勁d，自豪感多d…雖然係呢件事上，一句簡單既英文，簡單到係微不足道，不過司機唔識英文，顯得我比佢識多少少，有一點滿足感。更加既係，我又覺得英文原來都有好的一感<在於實在來說>，所以要努力d…
陳志強比果份會考B卷我做，15分先pass，我得十一分…差少少，所以我努力d應該合格既，希望啦…所以努力既話，應該可以掹車邊合格…
跟著返到屋企，上論壇，見到呀yam post返係暑假時，修econ既人做果份閱讀報告…張五常教授談讀書之道，老實說，這篇文章我看了不下數次，但卻很快忘記得一乾二淨，看來要認真對待反思才行啦！
返到來打日記，過得果半日…真不像話，不過見自己有咁多既感受，唔打又怕自己唔記得左…
可能，今晚會有日記下集睇既..........
但我知道都無咩人會睇=.="
如您有睇的話，我會好開心…不過，事實歸於事實，您應該是沒有看的…從前用godiary既時候，人流統計都有好多人，都可以自己呃自己，但係轉用fotop之後，就唔係lu…anyway，我都好希望您會睇，我知道您會明白我講緊邊個，也許是很無知的想法，不過都足以讓我自己像鴕鳥般那樣，把頭埋進沙裡…獨個兒高興，獨個兒沾沾自喜…因為我這種說話的態度，您是接觸得最多
另外，由於考試將至，日記將暫停服務，直至另行通告 |
