« December 2019 »
MoTuWeThFrSaSu
 1
2345678
9101112131415
16171819202122
23242526272829
3031 
Saturday 01st January 2005 01:36:40 AM

31/01/2005 - [ 一 ]

哈哈哈~ 終於沖好左我人生第一筒菲林啦~ 沖好果一刻即刻用燈箱第下個成果, 見到D負像好正常咁出現o係菲林上面, 果種感覺真係勁感動呀! 自己影, 自己沖, 跟住下個星期仲可以自己放相~ 即係成個過程都係自己一手一腳搞掂! 雖然需要好多時間, 但係果種做手藝o既感覺真係唔係 digital 相可以俾到~ 唔怪之得仲咁多人玩黑房啦, 好似我都開始愛上完全屬於自己o既黑白世界啦~ 正!

 

開始明白咩叫做有麝自然香呢個道理啦~ 今日又有 model 搵我私影啦~ 我諗只要每一次私影都可以做到D特別o既主題, 咁其他人睇到就可能有興趣搵我私影~ 如果不斷咁樣循環, 咁我一來唔洗再參加影會 function, 去影D質素無保證o既相啦, 二來可以更加確立自己o既 style~ 真係非常好喲! 唔重數量, 只重質量, 希望我都可以一步步咁做到啦~

 

原來攝影雜誌個訪問下個月先出, 仲以為佢地真係咁快手添~



30/01/2005 - [ 日 ]

今日去左私影~ 第一次一個攝影師對住一個 model, 個感覺真係好唔同, 因為全部野都係跟自己意思係點, 有時 model 又會俾D好得意o既表情你, 又刺激到靈感去影~ 個感覺真係好正, 純創作o既感覺, 今日真正感覺到攝影所要求果種創作力~ 個結果唔錯, 但仲有好大進步空間~ 努力啦, 下次 design 好成個題材之後一定要再約媚媚去影過~ 雖然佢都係第一次影, 不過真係幾有潛質~

 

confirm 左啦! 真係搬去錦繡喲! 應該係六月左右搬~



29/01/2005 - [ 六 ]
今日攝影學會 outing~ 去傾計多過影相~ 嘻嘻, 識左幾個 committee, 佢地話完左個全港學生攝影比賽之後就會開始招莊~ 仲好直接咁問我想做咩 post...... 好似好簡單咁喎~ 總之有得做搞事人就得啦~ 嘻嘻......


28/01/2005 - [ 五 ]

又一個星期五, 今日比上個星期五更辛苦, 因為今日個 bio div lab 要睇埋晒D樣衰到死o既 flatworm 同 roundworm, 好彩唔洗直接接觸佢地, 都只係睇 only...... 要摸佢地o既話我會死架.......

 

今日上完堂之後上左黑房班, 第一堂講理論, 都幾得意~ 比想像中多左幾步, 不過 steps 都未算太煩~ 好似放相仲多野搞喎~ 下星期就有機會親手試下沖~ 期待~

 

聽日去赤柱 outing, 好似話會有 model, 係BU讀書o既 part-time model, 原來我地學校都有人去開影會~ 估唔到喎~

 

你是誰? 路人? 不知道......



27/01/2005 - [ 四 ]

英文個SALL要開波做啦~ portait photography, 呢個 topic 會唔會太窄呢? 暫時只係諗到有 lightning, 角度, 構圖, 顏色, 4樣野講, 但係佢話要有5個 subtopic, 點好呢?

 

發現左原來 bio div o既 Dr Yau 如果唔講英文教書, 就咁用廣東話講佢係會講得幾好架~ 因為今日落左堂之後問左陣書, 佢解釋果陣都好仔細~ 而且可能正式開始教 individual phylum, 可能係佢比較掂o既野, 所以開始對 bio div 有返D信心, 希望可以 keep 到落去啦~



26/01/2005 - [ 三 ]

星期五開始第一堂o既黑房班喲, 好期待~ 而且星期六攝影學會又有 outing 啦~ 一定要記得問 Mabel 攝影學會幾時招莊先得~

 

發覺一月真係影左好多相, 可能係太多添...... 呢個星期六日仲要影, 我諗二月係時候放低一下部相機啦~ 等D感覺沉澱一下, 可能遲D會有新發現都唔定呢~

 

原來舖頭做到6月就關門大吉lu...... 老豆辛苦左咁多年, 都係時候休息下啦~ 所以搬去錦繡都好ge, 雖然遠左D......

 

今日發現左D野...... 雖然有D失望, 但係對自己黎講都可以話係一個解放~ 美麗的外表包著的原來都只是一膚淺的心靈...... 簡單D咁講, 即係深圳師奶拎A貸LV...... shit...... 有性格o既人都唔用LV啦...... 呵~ 故事又要重頭開始再講過~ 期待寄望緊張......



25/01/2005 - [ 二 ]
今日終於正正式式打左一次波啦...... 成個 sem break 都係影相影相同影相, 一次都無打過波...... 有D一次過將 sem break 積左落黎o既肥肉蒸走晒o既感覺~ 幾好~ 不過就真係好攰...... 我諗最少要休息幾日啦......


24/01/2005 - [ 一 ]

老豆仍然積極討論錦繡o既一切...... 前幾次佢睇完D村屋之後都無乜後話可言, 但係今次睇完之後就仲有好多野吹~ 而且都係好野~ 我o既直覺話俾我知我呢個港島人好快就唔可以享受5分鐘行到去中央圖書館o既便利啦......

 

今日終於明白咩叫知音難求...... 非常非常非常感謝 kirita...... 唔知點講...... 好多時做左好多野都得唔到認同o既時候, 突然遇到知音人, 我種感覺真係有"那人卻左燈火欄柵處"o既感覺...... 感動......

http://www.pbase.com/mochizuki



23/01/2005 - [ 日 ]

今日又去大埔海濱公園影相lu~ 呢個公園真係好大, 一個影人像o既好地方~ kirita 著 lolita 真係好夾, 佢個樣原本已經好日本人 feel, 加埋套咁有 style o既衫真係正晒~ 所以今日影D相出黎個 feel 都好有卡通片 feel~ kirita 可以話係我遇過最好o既 model~ 而且今日有個前輩o係日本跟過師父, 佢教左我影D而家日本最流行o既大頭相~ 背光o既同時用兩塊反光板照返塊面o既 detail, 咁就可以影到D低反差o既相, 個 feel 係有小小畫意~ 幾得意~ 不過始終都係生吞, 仲未化得晒個前輩D功力, 未係咁捉得到個神韻...... 層次差太遠啦~ 不過希望再有機會向唔同o既前輩學下野啦~

 

夜晚無啦啦去左睇樓...... 老豆今次好似認真啦....... 佢睇中左錦繡花園, 係呀, 係元朗o既錦繡花園...... 對我呢個港島人黎講真係好遠~ 個經紀好熱心咁車左我同媽子去睇~ 睇左幾座, 雖然遠左D, 不過環境真係唔錯~ 無論係兩層定三層都一定可以養貓, 因為間間屋都好鬼大~ 個經紀好努力好努力咁遊說媽子開票, 個情況有D似我暑假o係豐澤sell人買 plasma 咁...... 當然媽子唔會咁傻啦, 買菜咩...... 返到屋企已經一點幾...... 真係好遠......



22/01/2005 - [ 六 ]
買左幾隻 cd-r backup D 相, 不過原來好唔夠洗...... 因為一隻 cd-r 得七百幾mb, 我一張相都差唔多10mb, 去一次影會 function 就1GB幾, 用好多 cd-r 先 backup 到少少...... 有D想買 dvd-r 添......


21/01/2005 - [ 五 ]

星期五真係傻架...... 一朝早就上 bio div, 聽完佢一舊舊o既課文之後就上中文堂, 過左咁緊張剌激o既 double hour 中文堂之後終於可以食飯, 一個鐘 lunch 過左之後又要搏殺去做 biodiv lab, 因為呢個 sem o既 biodiv lab 一定係慢過 lecture, 所以一定要好好 pre lab...... 好彩 biodiv lab 都幾好玩, 唔算太悶~ 做完 lab 之後最慘就係仲要上一堂 cell bio...... 唉...... 痴線架......

 

非常寄待 year 2 呀! 可以上攝影學會莊之外, 仲可以上有 credit o既攝影堂! 不過 bio 就有辣有唔辣, 有得玩 genetic 但係要上 eco~



20/01/2005 - [ 四 ]

天氣凍o既時候可以靜靜地咁o係圖書館睇下書, 溫下書咁真係好舒服~ 發覺自己真係鍾意自己最多...... 貓都係天性需要好大o既個人空間架啦.......

 

聽日會真正遇上第一次可怕o既星期五啦, 10.30直踩到18.30, 中間得一個鐘 break...... 死亡......

 

update 左 02/08/2004, 旅行日記, 講九寨溝, 可以 click 返去睇下~



19/01/2005 - [ 三 ]

今朝上左堂 bio 之後就去買 bio div 書, $179 好貴...... 不過都要買, 因為個 Dr. Yau 講得都唔係太好...... 食自己仲好...... 買完書就返歸食飯瞓覺, 無去到睇貓lu, 因為雖然尋晚早瞓左, 但係今日仲係好攰, 而且條腰無啦啦痛起黎...... 唉, 好似好多老人病咁...... 忙左都係幾日je, 唔洗攰成咁呀..... 個 body 真係水皮......

 

黑房班有得上啦, 等左好耐呢~ 不過都係趕唔切o係全港學生攝影比賽之前上晒堂, 唔可以自己沖黑白相去比賽lu, 睇黎要諗諗計用 digital 相去打黑白組比賽lu~



18/01/2005 - [ 二 ]

聽日仍然未開始 cell bio lab, so, 可以繼續享受星期三美好o既 half day off~ 可以去影下貓喲~ 或者我去多D信號山果度餵佢地, 餵多幾次佢地會認得我啦~

 

上左第一堂 RP 啦, 個課程同 :ecturer 都還可以, 不過有少少悶, 不過如果轉其他科 RP 又唔知轉邊個好...... 點算好呀!???

 

今日唔知點解覺得好眼瞓, 係比平時更眼瞓@@...... 唔知點解...... 總之今晚一定要早瞓......



17/01/2005 - [ 一 ]

呢個 sem o既星期一只係有兩堂, lunch time 上完之後就走得囉~ 幾好~ 今日上完堂之後就同梁偉走左去 poly 幫 loho 個 PT soc D 莊員影相, 搞左一個鐘, 影左D交差相就走lu, 水準ok啦~ 影完之後就同梁偉上左信號山影相, 唔講唔知原來有果度有好多好多貓架~ 有成差唔多十幾隻~ 雖然都有D怕人, 不過都仲肯行埋我身邊食貓糧, cccc, 隨身攜帶貓糧果然有用~ 不過返到屋企開電腦, 點知唔知點解無左十幾張相...... 好彩梁偉果邊都有相交~ 下次一定要再去影過貓~~~

 

聽日又要上830堂...... 又有第一堂 rp, 唔知想點......



16/01/2005 - [ 日 ]

第一次 imagespectrum o既外影, 呢個會o既人普遍都幾勁~ 而且個 forum 俾 comment 都幾狠~ 可以學多D野喲~ 唔錯喲~

 

家姐今日返澳洲lu~ 今次佢放暑假返香港, 希望下次我放暑假可以去澳洲啦~ 好想試下去除左東南亞同大陸以外o既地方呀! 睇電視見到D景真係靚爆呀~



15/01/2005 - [ 六 ]
今晚同靚妹出左去尖沙咀食甜品 buffet~ 唔...... 佢又學人燒燶自己D頭髮..... 不過出奇地效果幾好, 成個人大個女左~ 果間咁o既 marco polo, 去到先話無甜品 buffet...... 好彩搵左陣, 不停咁打1083, 最後都搵到尖沙咀另一間, 凱悅去食甜品 buffet~ 不過都要等到成8點先有得食~ 去左九龍公園坐左陣, 同佢影相佢又唔肯...... 到左8點終於有得食啦~ D甜品比想像中少, 不過都幾好食, tramisu 同埋兩款有杏仁味o既餅特別好食~ 仲有好奇怪地唔知點解會有o既冬陰公湯都好正, 最衰個胃唔舒服, 食左唔係好多, 不過算啦, 等下次個胃好返D去搵間更好o既食啦~ 食野o既時候靚妹都開始慢慢都習慣對住鏡頭啦~~ 哈哈~ 最開心就係佢送左個貓貓年曆俾我做生日禮物啦~ 多謝喲~


14/01/2005 - [ 五 ]

食左一日藥, 個胃好好多啦, 無咁頂住晒~ 不過要好刻意咁將啖入左口o既飯咬多陣先吞落肚就有D唔慣...... 仲有就係唔可以飲氣水...... 要告別我最愛o既可樂一排啦~



13/01/2005 - [ 四 ]

十度加微雨, 真係有冰凍o既感覺...... 近排空氣差, 連D雨水都有陣味...... 好呀, 聽日都落雨啦, 星期六日出去影相就可以有好天氣啦~

 

尋晚個胃頂住頂住, 搞到瞓得好差. 今朝起身見無乜野以為無事啦, 點知越上越唔舒服...... 頂唔順, 知道舊校 clinic 睇醫生都係$20, 咁就去睇睇啦, 好似好多年無睇過醫生啦...... 入到去同個醫生姐姐問左陣野, 又 check 下我個肚, 最後佢話我胃酸倒流喎, 不過成因係咩就唔知..... 佢俾左3日胃藥我, 如果無用就返去 follow-up~ 有D估唔到佢都幾認真...... 唔似政府醫生是是但但咁~ 可能呢D就係以前簡sir所講, 要努力讀書入U要盡用o既福利之一啦~ 食左D藥而家好D, 不過仲係有D想嘔...... 今晚唔好嘔就ok啦......

 

今晚已經答左好多題目啦~ 聽日仍然唔洗做 lab, 空堂答埋佢, 夜晚執D相, 星期六就可以交功課啦...... 哈哈...... 登出黎唔知會點......



12/01/2005 - [ 三 ]

攝影雜誌果度 e-mail 左D問題黎啦~ 有成十八題呀...... 早知就上去佢果度做 interview 啦...... 答D問題果時搞到好似作文咁, 而家先答左兩題, 而且仲要執15張大相俾佢地...... 無啦啦忙起黎...... 佢話最好呢個星期俾到佢~ 唔通下個月果期就會出呢個 interview? 到而家都仲有D唔係好敢相信...... 無啦啦上雜誌...... 神奇~~~

 

今日去左拎 uzone 攝影比賽獎品~ 十桶菲林喲~ 有排唔洗買菲林lu~ 上年生日又係去攞攝影比賽o既獎品, 今年又係, 一年一個? 唔好呀, 我想今年個全港學生攝影比賽度有D成績呀! 希望可以還到我呢個心願啦~

 

今日個人十十下咁, 好似唔係好覺自己今日生日咁...... 21歲生日, 半睡半醒之中渡過....... 聽日第一次上830, 早D瞓吧啦, 聽日會見到好多新 lecturer, 英文果個唔知會係點...... 有D不安......



11/01/2005 - [ 二 ]

原來個 interview 係真的喲~ 今日對過個電話, 同雜誌上面個電話係一樣架~ 咁就膽粗粗打電話上去啦, 同果個 joseph 傾左陣, 佢問我想點做個 interview, 可以電話, 可以e-mail, 可以當面~ 咁當然e-mail最好啦, 可以俾我諗下點寫, 又唔使特燈上去~ 不過佢話要我15張相, 15張相唔係問題, 不過最少要6百萬像...... 咁即係唔可以俾我 crop 相啦~ 雜誌就係雜誌, output 真係高要求......

 

聽日返學lu, 經過左 sem 1 之後有左D經驗, 知道大學生活要點先可以比較有效率~ sem 2 各方面都應該可以過得好D掛~

 

e...... 唔記得左有一科 pe 左住左, seat 唔到 principle of photo image 啦...... 下個 year 2 elective 一定要 take 呢科呀!!!



10/01/2005 - [ 一 ]

GAP 終於嘔左出黎啦~ 2.93喲~ 比我想像中高左DD, biochem 同 micbio lab 都係得 B-...... 估唔到 BMS1600 有 A-...... 神奇! 好耐無見過成績表上面出現過A呢個英文字母啦~~~ 不過最估唔到英文竟然得個C...... 完全拉低晒...... damn...... 要讀 master 就最少要 first hon, 即係3點幾~ 呢個英文完全係左Q住晒ge科目...... sem 2 仲要同佢搞多幾個月, 絕對唔可以置之不理啦......

 

今日相簿無啦啦有個 comment 自稱係 PHOTO MAGAZINE 呢本野o既人, 話想同我做個 interview....... 即刻諗起街邊果D星探搵D豬扖做 model...... 雖然本雜誌係真o既, 而且仲係我第一次攝影比賽攞獎果本雜誌, 不過個人就唔知係唔係真呢....... reply左佢答應左個 interview, 不過完全無俾 contact....... 小心D好~

http://www.fotop.net/nicolo



09/01/2005 - [ 日 ]

第一次上影樓影相, 同想像中有好大分別...... 唔知係因為個影樓係屬於細果種定係點, 打燈只係兩眼主燈正面打埋去, 加一枝副燈o係左上方整走 model 面上o既陰影, thats all...... 點解我睇雜誌最基本o既打燈係有8眼主燈o係正面, 4眼副燈....... 另外就係個佈景好局限, 完全唔郁得...... 影果時就得好辛苦...... 不過今日都算開下眼界啦, 睇下D專業人士點樣 set 燈~ 好似唔係好難喎, 都係由低 output 試到上 高 output, 試到足夠 iso100, f8, 125 就停, 然後試下邊個位會有陰影, 打多一兩眼燈整走D影咁就大功過成~ 但係我諗即使再有機會, 除非只係一兩個人, 而且可以完全自己計劃晒燈位同背景啦, 如果唔係我都無乜興趣去影樓lu......

 

原本我地學校係有科 ctv1160, principle of photo image 架~~~ 超正呀!!! 好想讀呀!!! sem2 一定要準時 seat 堂, 一個星期都係一個鐘je, 而且o係舊校上, 上完堂去上 bio 都唔會走得好辛苦~ 正!



08/01/2005 - [ 六 ]

夜晚同波記班友仔去燒野食~ 好似好多年無燒野食lu...... 食到好飽~ 發覺自己食肉係會好快飽~ 另外就係證實左阿so真係傻架...... 用傻呢個字形容佢已經好保守...... 食完野多謝阿輝車我地走~ 佢手車都好掂喎~



07/01/2005 - [ 五 ]
唉, 唔覺唔覺就過左個 sem break 啦...... 12號就要返學lu~ 牛一正先先黎返學...... damn...... 而且好似仲未影夠相喎~ 呢個 sem break 太 enjoy 啦, 唔洗返工, 可以不停咁玩, 都係第一次有D咁o既假期~ 要等下年lu~


06/01/2005 - [ 四 ]
梁偉o係今日加入左單鏡機行列啦~ 哈哈, 有排佢中毒啦以後~ Nikon D100, 同我部D60同時期o既 product~ 好呀, 得閒可以拎黎玩下 Nikon 機~ 而且以後有人可以陪我去影會影人像, 仲好玩~~~


05/01/2005 - [ 三 ]
今日又經歷左一次死亡邊緣o既感覺啦~ 不過今次開D, 無咁邊緣...... 話說今日同豬精上飛鵝影相, 佢條友又勁遲到, 搞到成5點幾我地先開始上山...... 邊有人5點幾先開始行山架? 不過一場黎到, 上就上啦~ 一開始上山條路雖然崎嶇D, 不過都算可以, 但係上到咁上下就開始要手腳並用啦, 到左最後果段直情係要爬上去...... 行山變爬山...... 上去果陣時一路都有諗要點落山, 諗果陣都以為ok...... 咁上到山頂附近就開始影相啦, 不過個天都差唔多黑齊啦, 過左 magic hour...... 唔理, 照影, 因為個 view 真係幾好, 可以望到由彩虹到荃灣, D樓勁密, 到左夜晚開晒燈真係好靚~ 影到差唔多成8點幾我地先落山...... 要開始我地驚心動魄o既落山之旅啦...... 全靠一枝大陸制電桶, 我地仲可以見到有路...... 不過因為之前係要爬上去, 而家落就係 pk 形式咁落, "冼"左無數咁多次, 隻手因為要不停掹住D樹/草而損晒, 最好彩就係無人打劫我地...... 行到最後見到條馬路果陣真係勁感動...... 下次如果要再上去一定要早D落山......


04/01/2005 - [ 二 ]
今日原本諗住去大埔鳳園影下花花草草, 點知搭車去到大埔工業村, 行黎行去都搵唔到鳳園個入口...... 原本聽人講個入口就o係正工業村對面...... 最後只係搵左一塊空地影左D花就散lu~ 原來一日懶唔帶地圖就領野啦...... 記住要日日帶地圖~


03/01/2005 - [ 一 ]

今日天氣終於無咁凍啦, 可以拉返琴啦, 雖然手指比較硬, 不過感覺仍然良好~

 

突然有溫書o既興致~



02/01/2005 - [ 日 ]

今晚波記飯局, 去左世貿食一間食bbq類物體o既地方, 阿輝幫我地叫左好多好多好多野食, 都算幾好食, 不過就幾貴下~ 每人百二~ 下次如果呢個價錢我想食甜品 buffet 喲~ 好似差唔多錢~ 但係有好多好多好多好靚亦好食ge甜品架~ 臨走果陣我地仲深究左一陣點樣愛先愛得最舒服呢...... 呢個咁大o既tpoic添...... 仲俾左我地o既答案俾 Trunks 參考~ cccccc~ 跟住去左陣幾年無入過o既機舖坐左陣就散水lu~

 

嗚嗚, 今個 sem 個 timetable 出左啦, 勁pk囉...... 兩堂830...... 仲要係返去上pe...... 從未如此白痴過...... 星期五又要勁多bio, 做完lab都未走得...... 而且英文堂其他同學仔都改左 session...... 唔可以再一齊上堂啦...... 另外星期二上完 u-learning 之後無啦啦又要放一堂中交o係度...... 搞到之後上晒10個 u-learning 之後都唔可以早走...... 總之呢個 timetable 令人充滿住無奈同粗口...... damn......



01/01/2005 - [ 六 ]

05年元旦日一早就俾人噪醒左..... 要去開舖 again...... 無計, 老豆近排身子弱..... 不過應該唔係長期問題, 都係天氣太凍作怪je, 而家成屋人得我一個係正常健康狀態...... 邪......

 

update 左暑假旅行o既日記, 趁仲記得呢記日就寫埋佢~ 有時間就去睇下啦, 無時間就唔好睇啦~ 你咁 busy~ lol~

http://web.celtironium.com:8080/dialogue/nicolo/diary?y=2004&m=8

Name
Security code
CAPTCHA Image Reload
Verify security code
Message