Wednesday 01st December 2004 01:35:37 AM
|  |  31/12/2004 - [ 五 ] | | | | 今日同阿競, 仲有 cindy 去睇 the phantom of the opera~ 因為唔想阿競走太遠, 所以去左沙田睇, 以前成日覺得沙田係好遠o既地方, 不過自從入左U之後, 日日都要過九龍, 所以已經習慣左啦~ 套戲都幾好睇呀~ 成套戲都好似以前D粵語長片咁, 大部份台詞都係歌曲形式~ 成套戲最好睇都係最後果 part, 幾感人下~ 同埋套戲D音樂都係預期中幾好~ 睇完戲之後就去左沙田文化博物館~ 呢$5入場費真係抵~ 好多好正o既 poster 同 concept 好得意o既 product~ 睇睇下仲俾我諗到點 extend 我個 shitphotography 相集~ 唔...... 贂黎下個星期係時候去巡遊下香港唔同地區o既公廁啦~ 哈~ "我愛你．我狠你"~ http://www.fotop.net/nicolo/shitphotography | | |
| | 30/12/2004 - [ 四 ] | | | | 一朝早7點就起身同媽子開舖~ 係7點呀! 自從入左U之後就未試過咁早起身啦~ 不過勁凍勁唔想起身, 但係老豆要去睇醫生, 無計啦...... o係舖頭呆坐左3個幾鍾之後就去接老豆, 無事啦, 醫生都係俾左D降血壓藥佢je~ 佢D高血壓都係自己個人太緊張搞成啦, 叫佢食少枝煙, 佢話好, 不過轉頭就唔記得左啦...... 唉...... 天氣太凍啦, 手指都硬晒...... 搞到無乜 mood 拉琴...... 連打字都成日打錯...... 成間屋最暖就係個 toilet...... 搞到我成日坐o係 toilet 睇書...... | | |
| | 29/12/2004 - [ 三 ] | | | | 無啦啦想去鯉魚門行下~ 因為好似一個咁出名o既地方我竟然未去過~去左油塘地鐡站, 都唔知點行先去到~ 咁就跟大馬路亂咁行啦, 行左3個字左右竟然去到碼頭~ 原來鯉魚門即係一大堆海鮮酒家咁解~ 附近有個石灘仔, 因為有大量瓦片堆積, 當有浪沖埋岸o既時候會發出叮叮噹噹聲, 好好聽喲! 估唔到o係一個咁o既地方都搵到寧靜聲音~~~ 行完石灘就搭渡輪過返去西灣河, 呢條路線真係好奇怪...... | | |
| | 28/12/2004 - [ 二 ] | | | | 靜靜地咁坐o係阿貓地攤睇書真係好好好舒服, 耐唔耐有隻貓o係你附近行過俾你摸兩摸, 跟住又走開~ 而且o係咁凍o既天氣, 飲一口熱朱古力, life is really like a dream~ 買左個死人電話, 時間觀念返來lu~ | | |
|  | 26/12/2004 - [ 日 ] | | | | 又去西貢啦, 不過今日唔係去行山, 係同老豆去睇樓~ 佢話打聽到有座村屋幾好, 咁就部佢去睇下啦, 話晒佢下年都退休啦, 搬去D靜D o既地方始終好D o既~不過睇完之後就知道唔o岩啦....... 條村離西貢市中心都要兩個字車, 村口去到果間屋又要差唔多兩個字, 對我地呢D住慣市區o既人黎講真係太遠啦...... 雖然間屋就幾靚下, 不過都係唔洗諗啦....... 快D星期三啦, 好想快D知道麥當勞個 bear bear 攝影比賽結果呀~ 都花左D心機架,不過應該真係好多勁人去玩...... 呢幾日又再開始聽 radiohead o既歌~ ok computer 呢隻碟真係幾多正歌下, 不過未開始睇歌詞, 只係 melody 同編曲已經好正啦~ 嘩...... 大地震+海嘯呀...... 希望...... | | |
| | 25/12/2004 - [ 六 ] | | | | 今日雖然係聖誕節, 不過因為人太多, 所以都無乜興致出去玩, 仲記得前年聖誕節係我咁大個仔最唔開心o既聖誕節...... 不過如果唔係因為有過咁o既經驗, 可能我仲未學識珍惜安穩o既感覺~ 更可能入唔到U, 因為始終都有D要逃避o既心態...... 唉, 算啦, 唔開心o既野唔好諗啦~ 既然已經成功過關, 好好咁努力仲好啦~ 無無聊聊行好耐無行o既HMV, 見到范曉萱竟然出新碟~ 仲見到好多CD想買...... 但係因為返大陸果陣唔見左個電話, 雖然我個電話唔值錢, 但係又要錢買返個...... 可惡...... 唯有遲D先買碟啦~ 原來浸禮真係要浸濕晒個人喎, 仲以為係咁二濕下個頭就算添~ 今日睇方知行行浸禮果時, 聽到一句好緊要o既野, "真正o既愛即係委身o既愛......" 唔...... 委身, 真係唔係咁易做到喲...... D人好多時話自己好鍾意好鍾意一個人, 但係又有幾多個可以做到委身以愛? | | |
|  | 24/12/2004 - [ 五 ] | | | | 經驗真係好重要, 今日同豬精再次行西貢大浪灣~ 哈~ 今次無傻傻下走上山啦~ 今日天氣真係好好, 風和日麗, 非常之o岩影相同行山喲~ 所以都影左幾張正野~ 豬精都好似都有D天份~ 希望佢真係可以 keep 住去學啦, 點都叫做有一技之長呀~ 聽日朝早去睇方知行行浸禮~ 第一次喲~ 跟住就繼續流浪~~~ 不過去邊好呢, 仲未諗到~ 平安夜...... 平平安安咁過就ok啦~ | | |
|  | 23/12/2004 - [ 四 ] | | | | 今日去左粉嶺影相, 因為有個唔知乜鬼細花展, 去到果度先知原來係將3月果時花展o既花再 show 多之出黎~ 雖然3月果時已經影過唔少花, 但係果時仲未有單鏡機~ 而家去影多次, 影出黎果然唔同D, 幾好喲~ 可以隨心所欲咁去邊就去邊個感覺真係好正! 雖然都仲係局限o係香港, 但係個感覺都唔錯~ 聽講果洲群島好靚架, 真係想去睇下有咩咁正~ | | |
| | 22/12/2004 - [ 三 ] | | | | 終於可以寫番日記囉~ 返左鄉下幾日, 攰死左...... 上禮拜日朝早五點鐘左右就起身去太子搭直通車, 前一晚影相, 搞到3點先瞓, 所以基本上瞓左2個鐘就要起身...... 勁辛苦...... 一上到車就有理無理瞓左先, 坐左12點左右就到左潮陽~ 跟住就開始呢幾日o既探親團...... 只係識聽1/3潮州話又完全唔識講o既我返到鄉下唯一可以做就係同D親戚o既細路仔玩~ 同細路完識唔識講野都係咁啦~ 勁同佢地影相, 勁得意~ 發覺我第都應該係會縱壞個仔果D老豆, 因為我真係太鐘意同細路玩啦! 咁樣點教仔呀!? 不過呢D野遲D先諗啦~ 哈~ o係鄉下仲食左好多野, 不過始終最鍾意都係湯圓~ 星期一拜完山之後就返香港lu~ 香港學生公開攝影比賽就黎開始報名啦!!! 不過仲未有章程可以睇~ 我好似仲未有一張勁滿意o既黑白相呀....... 呢幾個星期要努力影多D黑白相啦! | | |
| | 17/12/2004 - [ 五 ] | | | | 今日將個狗竇執番做間瞓得人o既房之後就去左淺水灣影日落, 因為記得上年影過一筒黑白幾靚~ 想試下同一位置用 digital 影出黎個效果係點~ 個沙漠無乜人, o係度好舒服咁睇下書等日落~ 影到7點左右就走lu~ 番到屋企睇番D相, 其實 digital 個 contrast 都唔係差太遠je~ 不過始終唔係 full frame, 枝50mm要計番個 crop ratio, 我又無 wide 鏡, 所以影出黎都係怪怪地咁...... 算啦, wide 鏡呢家野都要等到暑假先得架啦~ 豬精話要學影相...... 上次萬聖節果日佢已經話要學, 好似想o黎真喎~ 聽日同佢一齊去影一日, 一試就知係唔係三分鐘熱度啦, 你估影相真係o禁一下快門咁簡單咩~ | | |
| | 16/12/2004 - [ 四 ] | | | | 終於重光啦~~~ 等左呢日太耐啦~ 個 biochem 多謝 Chris Wong 啦~ 基本上係佢教果 part 先寫到野...... 個 enzyme 同 ATP production....... 不提也罷~ 呵~ 理得佢死~ 考完試去買左條富貴 shutter 線, 電子野即係電子野....... 去左銅鑼灣防波提影左陣相~ 但係而家冬天, 個天6點過D就已經黑齊...... 影唔到 magic hour...... 而且果個位好大風, 衣衫單簿o既我影左個零鐘, 試左塊 ND8 filter o既 effect 就走lu~ 不過算啦, 唔心急喲~ 有成個月俾我玩喲~ 聽日又搵下D特別地方影下相先~ 最緊要係 design 好幅熊仔相要點影先~ 一定要與眾不同o既方法去影先有可能贏到D勁人...... 呢個 sem break 仲要睇多D外國o既時裝雜誌, 下次影人時試下D新角度~ 兩日無掂個琴,今日拎番上手即刻舒服晒~ 正!!! 呢排睇 newsgroup 見到好多人買單鏡機, 有D有錢o既仲買埋幾枝L鏡...... 但係睇佢地 post 出黎D相, 有D都ok, 有D就真係不知所謂...... 又見到而家果D乜 show 乜展覽, 一定會見到一大班人o係度亂咁影...... 跟住 post 出黎D相基本上都係用淺景深加條女上去, 乜背景都唔理......咁同 photoshop paste 條女上去有乜唔同??? 唉, 影相呢家野, 唔係有好器材就一定影到靚相o既...... | | |
| | 15/12/2004 - [ 三 ] | | | | 今日 BMS 出奇地竟然對中醫果 part 幾有信心~ 因為同 pastpaper 好似~ 有D直情係老dup~ 應該無乜大問題ge...... 考埋聽日最難果科 biochem 我就升仙啦~ wakakakaka!!! 記住宏觀調控, 唔好睇到咁入就 ok 架啦!!! 就讓我們奔向美好的明天吧~~~ <--- 低能...... | | |
|  | 14/12/2004 - [ 二 ] | | | | 今日 micbio 不過不失咁啦, 吊得起條命又唔得你死果隻啦~ 聽日 BMS, 仲未溫晒D中醫野...... 陰陽五行仲六淫, 跟手仲有臟腑經絡學說, 仲要記埋D唔知乜野二陳湯...... 上堂果時聽就好得意, 到而家要考就死得...... | | |
| | 13/12/2004 - [ 一 ] | | | | dudududu...... 特別新聞報導; 一連四日o既他媽的考試今日開始~ IT1140 正式 certify~ datatbase 成為重災區~ 幸好有 mc 頂住, 所以仲有生還機會, 應該唔大炒~ 聽日係 micbio 考試, 學者預計未來3日o既餘震應該唔會造成巨大人命傷亡, 但係都呼籲各界人仕做好心理準備~ 特別新聞報導完畢, dududududu, damn...... 家姐帶左佢個男朋友仔黎屋企見家長, 老豆竟然無好似審犯咁審問佢~ 神奇! 跟住仲話我幾時帶一個上黎...... 我話有排~ shit...... | | |
| | 12/12/2004 - [ 日 ] | | | | 今日返學校溫書, 舊校果度竟然俾大量賓賓佔據......!!! 可惡, 仲要sce709都唔開! 好彩 common room 意外地無乜人...... 不過就耐唔耐有賓賓走入黎丁野食...... 真係當正係佢o既地頭...... 4日...... 仲有4日就考完試啦~ 考完就要影相影相影相啦~~~ 大學o既 sem break 同中學唔同, 大學 sem break 唔會有功課, 唔會有任何負擔, 可以盡情去玩喲!!! 期待!!! | | |
| | 11/12/2004 - [ 六 ] | | | | 好野~ uzone 個攝影比賽拎左個第3, 有10筒菲林做獎品~ 有排唔洗買菲林lu~~~ 等我買部 lomo 機玩下先得~ http://www2.uzone21.com/project/wecare/wecare_result.html 今日溫IT溫到想死...... 極無聊, 極悶!!! 真係寧願溫10頁 biochem 都唔想睇1頁IT...... 不過星期一就要考IT啦...... 點解IT要係3個 credit 架??? 唔想溫呀!!! 鼻敏感發作!!! shit...... 不穿鞋的公主...... 非常好o既主題呀!!! | | |
| | 10/12/2004 - [ 五 ] | | | | 今日竟然o係 BU 見到章培傑~ 神奇~ | | |
| | 09/12/2004 - [ 四 ] | | | | 英文考試感覺良好喲~ 人生咁大個仔第一次o係法定時間內做晒一份英文考試卷~ feel so good~ 雖然有好多 vocab 唔識, 不過...... 唔理囉~ 呵~ 搞下D biochem 同 micbio 唔好!? 仲諗? 今日首 pachelbel canon 有2個半 bar o既進展~ 好~ 明天請早~ 唉, 無用呀你, 又中招...... 今次係孫燕姿o既"同類"...... | | |
| | 08/12/2004 - [ 三 ] | | | | 今日o係學校個私竇俾人霸左...... 可惡...... 唯有去電腦室溫, 好彩都唔係太多人, 所以今日都溫得幾好~ 搞掂左個 virus 同半個 aa metabolism, 聽日一定要搞掂晒成個 aa metabolism 呀, 唔係我驚會無時間溫番 carbonhydrate metabolism 呀...... 加油! 好野~ 聽日就考試啦, 快快趣考完試又可以玩啦~ 要影 bearbear, 燈飾, 仲想快D起檔影 product 呀! 一定好好完~ 諗下點影到舊擦膠靚靚就已經夠好玩啦~ cccc | | |
| | 07/12/2004 - [ 二 ] | | | | o係學校溫書真係正好多好多~ 效率基本上係90%, 差唔多唔洗休息, 一開波就直踏到收工~ 當然就算係學校如果係考試期間o既圖書館我又係唔洗溫...... 太多人啦...... 今日已經大致溫完個 lipid metabolism, 當然遲D仲要埋一埋尾啦~ micbio 主要都係睇一睇 test 之前教過o既野je ~後日就係英文同 pe 考試, pe 可以唔理, 不過英文就要溫下啦~ 今晚望一望 Lizzie 今個 sem 教過咩先~ 下星期先係正餐, 1234都有大考試~ 努力努力!!! 有時候D歌唔一定要好難先好聽o既~ 今日見到人拉幾首好簡單小提琴o既歌, 全部都係用一把位就拉到, 都拉得好好聽~ 呢D就係高手吧!~ | | |
| | 06/12/2004 - [ 一 ] | | | | 今日係眼淚大傾銷日...... 唔係有咩傷心事發生, 只係聽左林一峰兩首 live o既歌, , 一首係重回布拉格, 一首係燕尾蝶, 兩首歌原本已經好鍾意,但係 live o既 version 真係好正, 除左個俾個 melody 感動到之外, 最緊要係果份感情...... 真係完全中晒招囉...... 唉, 唔知點講好...... 總之呢排期待緊o既感動, 一之過走晒出黎....... 都唔知自己講緊乜...... 想聽歌o既人可以去買林一峰"遊樂會2004"呢隻碟...... | | |
| | 05/12/2004 - [ 日 ] | | | | 今日又有得影相啦~ 今日係去馬灣影~ 嘗試用更多唔同o既角度去影, 不過出黎效果好似唔係幾好...... 同埋今日發現左人o既心情真係好容易可以從面部表情觀察得到~ 如果個 model 心情係唔開心o既, 真係點影都影唔到佢開心o既感覺...... 唉...... 容許我再o係度呻多次, 最後一次啦...... 真係好想有個私家 model~~~ 因為心目中已經有最少兩張相係完全諗好晒要點影, 燈光服裝眼神姿勢係點都諗好左, pose 係就係比較奇怪D...... 不過出黎個效果應該會幾好...... | | |
| | 04/12/2004 - [ 六 ] | | | | 好幸福地 hae 左一日~ 不過真係幸福? 有時真係覺得幾矛盾, 要做一個好o既攝影師, 唔單只要有敏銳o既目光, 最緊要係要有敏銳o既心, 咁先可以影到D touching o既相...... 但係咁樣個人就會好情緒化...... 失去左平靜o既心境...... 兩樣野我都好想要, 但係根本無可能同時擁有...... | | |
| | 03/12/2004 - [ 五 ] | | | | 今日本身係 sem 1 lastday, 不過竟然變左音樂日~~ 阿競, 阿輝 Cindy 同我四個上完 micbio 堂, 食完飯之後我地4個人就去左 ac hall 後面勁拉琴~~~ 勁好玩, 從未試過一日玩咁耐小提琴~ 玩到成7.30再一齊去聽 handbell concert! 正! 阿輝o既二胡真係好勁~ 佢拉琴果時個樣真係好 enjoy~ 我諗佢真係好好好鍾意拉二胡~ 而且 Cindy 同阿輝都可以隨心所欲咁拉D好得意o既歌仔出黎~ 好好玩呀~ 可能佢地樂理底子好所以就可以咁啦~ Cindy 見到我寫D奇怪符號o係份譜果陣佢都唔知我o係度寫乜~ 自學係咁架啦, 邊識D咁 formal o既野呀, 不過原來識睇 letter name 係好緊要架~ 另外我仲發現我隻耳仔真係好遲鈍, 對比 阿輝同 Cindy 佢地一聽就可以聽得出有無走音真係差得遠...... 唔...... 呢個 sem break 可以先定3樣要做啦, 第一就係要拉晒成首 pachelbel canon, 二就係練好 greade 1-3 o既scale, 要學識D letter name 果隻, 三就係練琴時候順手練好隻耳仔~ sem break 之後希望可以一齊夾一次 pachelbel canon 啦~ 一定好好聽~ 今日玩玩下琴果陣, 大約六點左右竟然見到彩虹呀!! 勁靚靚呀! 可惜無帶相機, 道彩虹好近好近~ 可能會有好運帶俾我地呀~~~ | | |
| | 02/12/2004 - [ 四 ] | | | | 今日係上左大學以黎第一次考試呀! 叫做幾順利咁啦, 因為份卷唔係太深, 基本上溫過書就實識...... 唉, 幾怕呢類考試, 雖然考完會好心安理得, 但係鬥準o既話我係實輸o既, 我太大頭蝦啦~ 一定好多 careless mistakes~ 如果係好難o既題目, 然後一齊鬥諗我就有D信心je...... 我預感到今次考試個 mean 會o係85分左右...... 95分以上都應該唔少人...... 不過算啦, micbio lab 都係1個 credit je, 應該唔會o係 GPA 上面拉開好多ge....... 下星期開始要回歸 AL 生活啦...... 聽日就係今個 sem 最後一日, 好似好快咁...... 反應遲鈍的我, 而家先開始明白何謂大學生活...... 下個 sem 希望可以好D啦, 好D o既意思當然唔只讀書啦...... 今日上今個 sem last 堂英文, Lizzie 教我地跳舞, 幾好玩喲~ 一班人仔咁樣玩, 好過 o'camp 咁一大班人咁玩~ 睇到報紙話下年 art center 會開個香港唯一一個攝影o既 degree, 幾有興趣喲~ 不過太貴啦! 3年要成18萬...... 貴過我而家個 degree 3倍囉..... 好多師兄都話零願拎18萬去買一堆器材...... 不過反而留意到原來中大都有個攝影o既 cert.~ 一年je, 而且只係1萬銀! part time 讀o既話應該ok喎! 下年二月就開學啦! 讀唔讀好呢? 但係一萬銀點黎呢? 無理由問屋企架...... 如果唔問屋企, 咁就一定要等暑假搵工之後先有錢, 咁就要下年先有得讀啦喎...... 點好??? 特然覺得愛情係一定要建基於一段長期o既關係之上, 所謂o既一見鍾情根本只係對一個有強烈好感, 同愛情仲差好多皮~ 頓悟..... | | |
| | 01/12/2004 - [ 三 ] | | | | 人在最高興的時候總會遺失一些東西 人在最悲傷的時候總會找到一些東西 昨天我得到了 但今天我又失去了 這代表什麼? 那又代表什麼? 在胡同裡徘徊 明知你就躲在牆後 我聽到你的呼吸聲 你可聽到我在哭? 羊 | | |
|