« December 2019 »
MoTuWeThFrSaSu
 1
2345678
9101112131415
16171819202122
23242526272829
3031 
Thursday 01st July 2004 01:32:51 AM

31/07/2004 - [ 六 ]

第四日(31/07/04)

晨早六點幾天都未光就出發, 諗住可以睇下峨眉山日出~ 行去巴士站, 乜都未開工...... 無計...... 有幾個的士佬埋黎圍我地, 同佢地殺下價, $50上車~ 去到峨眉山大門, 見到D標價已經嚇一下, 成個景區分開唔同 part, 勁多門票要買, 同梁偉考慮左一陣, 雖然見到個天已經光左, 而且烏雲密佈, 睇到日出o既機會已經無乜可能...... 不過去呢D咁O既名山唔上山頂真係有D遺憾~ 所以最後決定上山頂~ 先坐車上雷洞坪, 即係接近山頂O既地方~ 呢度車飛先係$30一個人. 沿途風景唔錯, 都幾期待山頂個景會係點~ 上到中途, 多謝$120一個人上山...... 算...... 車繼續再上, 半個鐘左右終於到~ 落車, 好凍! 可能得果十幾度...... 行左半個鐘山路, 風景幾靚下, 不過係大霧左D~ 去到覽車站, 門票 again...... 覽車飛$40一張, 好, 再俾, 都決定左要上頂囉~ 覽車時間唔過10分鐘...... 上到山頂, 噢! 他媽的, 周圍都係霧, 乜都影唔到...... 山頂有幾間寺廟, 不過間間都要買入場券...... 我同梁偉都無乜心機, 行左一陣就決定落山...... 因為唔想再買飛, 所以決定行落雷洞坪, 行行重行行, 行到想死...... 條路鬼咁斜, 行左成個幾鐘先落到雷洞坪, 用埋果小小氣力, 行到車站上車落山, 相信係最後一張飛掛, $30, 買! 上左車即刻昏迷, 個司機轉彎勁快, 搞到我想嘔...... 終於落到山啦, 梁偉去搵車番招待所, 我已經無力行啦. 搵到一架麵包車, 幾好~ 上到車個司機幾好人, 同我地吹下水~ 吹吹下知道佢原來會做埋去九寨溝O既生意, 咁我地就順便問下價啦~ 一問之下, $1000一位, 唔...... 比我想像價左D, 不過始終包車O既話自由度大好多, 而且佢話有親戚O係果邊開酒店, 可以幫我地搵平酒店~ 我地 KEEP 左佢電話, 始終要考慮下~ 番到招待所, 同梁偉商量左陣, 梁偉又打電話俾佢個開旅行社O既親戚問下, 最終都決定包起個阿叔...... 同佢架車~ CALL 番個阿叔, 佢提議我地今晚番去樂山果邊住一晚, 聽朝一早出發九寨溝~ 佢幫我地搵左間$80 O既酒店, 勁平~ 仲車我地去幾個唔洗錢O既景點影下相~ 睇黎呢個阿叔應該信得過O既~



30/07/2004 - [ 五 ]

第三日(30/07/2004):

朝早9點左右, 火車終於串州過省咁到達成都! 尋晚瞓得好DD, 可能個人已經習慣左火車生活. 一落車我地就照計劃再坐程車去樂山. 行到車站口即刻有人問我地去邊, 問佢幾時有車去樂山, 原來半個鐘有車, 咁就去食個早餐先啦, 成都第一餐就話俾我地把口知成都人口味...... 勁鹹, 勁辣! 要習慣下啦, 因為呢十幾日都係呢D口味啦~ 食完野去搵番果條友上車, 其實要上咩架車都唔知, 不過呢個可能就係我地貧賤旅行團   O既宗旨啦, 隨遇而安啦~ 上到架小己巴, 勁多人, 勁臭..... 忍啦~ 忍到中途, 無啦啦話要轉車喎, 跟住就上左架好豪O既大巴, 由地獄彈上天堂~ feel good~ 坐左一個鐘就到樂山啦~ 就o係車站對面有間睇落ok o既招待所, 入到去睇下價錢, $120雙人, 好, 就呢間~ 上到去見到有獨立廁所, 真真高興~ 整頓好D行李就出發去我地第一個目的地-樂山大佛~ 問左睇門口o既阿伯點去樂山大佛, 佢話坐3路車就得~ 是是但但咁食個 lunch, 好平, $14 有一炒菜+一正宗麻婆豆腐+無限白飯~ 食飽就坐車去睇大佛, 人幾多下~ 行左2個字石級就見到個大佛頭, 真係好大, 比想像中更大..... 好多人o係到影D到此一遊 STYLE O既相. 就係咁我地O係個景區周圍行, 呢個大佛對我呢個信基督O既人黎講意義唔算太大, 我只係當佢係個大雕刻咁睇, 盡量將佢影得宏偉D~ 相反梁偉好似幾 like, 佢仲話有D朝聖性質..... 人各有志啦~ 到我地睇完晒個場都差唔多要清場, 再買一兩件手信俾媽子就走人lu~ 番去招待所果頭食飯, 都係果間啦~ 咁就完成左第一個景點~ 一切幾順利喎~



29/07/2004 - [ 四 ]

第二日(29/07/2004):

尋晚成晚都瞓得唔好, 好多人O係走廊行O係行去, 又唔知會唔會有人偷野, 到左3,4點先半睡半醒咁瞓左陣...... 又行坐下瞓下, 睇下窗外風景, 有D地方風景都幾靚, 不過因為開冷氣, 個窗開唔到, 影唔到相...... 就  O係咁樣, 火車經過左湖南, 貴州...... 仲要捱多晚......



28/07/2004 - [ 三 ]

我同梁偉o既貧賤旅行團終於歸來啦~ 去左成十一日, 都係$3XXX, 雖然D景點仲末玩晒, 但係都七七八八啦~

 

第一日(28/07/2004):

約左梁偉8點左右O係紅磡集合, 順利過關後就上火車, 上一架可能係我地旅程中最舒服O既火車, 坐位舒服, 仲有礦泉水派~ 坐咁舒服O既車, 一個幾鐘好快就到, 到左廣州東站就即刻打的去梁偉阿婆O係廣州O既屋企~ 放低晒D行李就去買D水同食物, 因為由廣州去成都O既火車要坐成四十個鐘喲~ 買左D水, 杯麵同零食, 梁偉O係廣州住過, 所以都好熟D路~ 跟住番去佢阿婆屋企食個 lunch, 休息下咁. 2點左右我地就去廣州火車站啦~ 火車站好多人, 龍蛇混集, 再一次 feel 到大陸O既地方同人 O既複雜...... 到左差唔多開車前4個字到我地就入閘啦, 我地好守紀律咁排隊, 但係原來排唔排都係要同D盲牛撞入去...... 幾經辛苦我地入到閘啦, 離開車時間仲有5分鐘, 拿拿聲走去我地上車O既月台, 有驚無險我地都上到車~ 呢程車我地係買硬卧飛, 搵番我地個格, 一格有6張床, 上中下+左右, 第一次見到咁O既住宿, 有D唔知點..... 不過唔理啦, 當係見識下囉...... 梁偉同我瞓左右最下床位, 多張台用, 算係比上面果D好...... 火車開啦, 坐O係張床睇下書食下野吹下水, 到左十二點就成卡熄燈瞓覺.



27/07/2004 - [ 二 ]
尋晚唔知點解勁肚痛, 其實由尋日 lunch 就開始痛...... 次次都係咁, 去親旅行之前都係一定要病下...... 上年係咁, 今年都係咁...... 原來就算去十幾日旅都唔一定要帶好多野je~


26/07/2004 - [ 一 ]

o係豐澤o既最後一日~ 番工前走左去買d西餅, 當係答謝各師兄o既照顧啦~ 不過今日生意唔係咁好, 好彩我都有數交, 有一隻 lcd 同 home theater, 希望以後佢地好生意啦~~

 

後日就出發去旅行啦~ 聽日有好多野要預備喲~ 呢兩日成都果邊d天氣都唔錯, 好彩...



24/07/2004 - [ 六 ]

成個 trip 已經大概定左好啦, 28號出發, 29號到成都, 30號同31號睇樂山大佛, 31號中午就出發坐12個鐘巴士, 去最緊要o既九寨溝, 3日都應該睇得曬掛, 然後4,5號去埋o係九寨溝附近o既黃龍, 最後就番成都食下野, 行下咁, 8號就番香港, 9號到香港, 10號就可以上網睇派位啦~ 最難捱o既十幾日等待, 可以o係旅行中消磨, 正~~~

 

番多兩日工就可以休息下啦!



19/07/2004 - [ 一 ]
俾左辭職信 Simon, 26號就 lastday, 然後28號就出發去九寨溝啦~ 一個星期, 仲有一個星期就可以去一個可能係一生人見過最靚o既地方啦! 睇黎呢幾日要預備下去旅行o既野啦~


17/07/2004 - [ 六 ]
踢對拖鞋, 著條短褲, 夜媽媽走出街週圍行, 週圍影相, 會覺得自己係影緊呢個城市o既安靜一面~ 又可以得閒企o係街邊, 望下D人o既面部表情~ 又或者諗下D無聊野~ 個感覺真係好自由喲~


16/07/2004 - [ 五 ]

今日十一點左右掛八號風球~ 成個商場都無人...... 最高領導人 Simon 決定俾我地D SR 或者 promoter 早走~ 勁開心! 原本呢個禮拜係勁辛苦, 要等到星期日先有得放假, 而家多左一日假~ 番到屋企就即瞓啦......

 

同梁偉決定左28號出發去九寨溝旅行, 而我就決定番工番到26號就算啦~ 聽日同 Simon 講先得~



10/07/2004 - [ 六 ]
放工番屋企即刻開電腦轉 choices, 當然要保險D啦, 一切以有U入為緊, 而家頭6個: 1)ust bio, 2)ust chem, 3)poly medic lab science, 4)poly app bio, 5)poly app chem, 6)health tech, band b 果D全部都過左 median, 應該得掛~ 一月果時我記得講過今年只要兩個驚喜, 上主成主已經俾左一個驚喜我, 只要多一個, 一個咁多...... 感謝......


09/07/2004 - [ 五 ]
從來未試過搭車番學果段路係咁長同咁辛苦...... 一路上心情都係勁緊張, 而且勁想嘔...... 8點左右番到學, 見到唔係太多人, 吹下水咁, 一陣之後 Mr Mok 就到啦, D人都陸續番到啦, Mr Mok 先派埋D廢野, 到左派成績啦, 之前D人好似無乜表情咁, 好冷靜咁, 我都唔係咁敢問人成績點, 終於都我啦, 行埋去果時, Mr Mok 求其講左句 "阿郭今次考得幾好呀, 有C有D......" 果下真係唔知點反應~ 睇真下張 cert, 掃落去, 無F~ 再睇埋個英文, E左, 掂!! 最緊要英文合格! 然後望番上面, chem C, bio D, 幾意外下, 同我預期調轉左, 不過算啦~ EDCDE, 開心到爆! 即刻打俾老豆報喜~ 呢一次可以話係我讀書以來, 努力同成績比例最好O既一次, 以前每一次考試都係有失望, 今次係第一次比預期好O既一次呀!!! 勁開心喲~~~


05/07/2004 - [ 一 ]

終於都 update 番個相簿啦~ 因為影左差唔多半年菲林, 而家終於重返 digital~ 當然菲林真係無法取代! 尤其係黑白相...... 總之兩樣都係主力啦~ 可以一步步將我個相簿豐富佢啦! 始終人文攝影先係我o既理想......

 

星期五就派成績啦! 呢排都開始有D緊張啦...... 有兩個C就可以坐定粒六啦!



01/07/2004 - [ 四 ]
300D 入手, 值得紀念o既一日......
Name
Security code
CAPTCHA Image Reload
Verify security code
Message