« December 2019 »
MoTuWeThFrSaSu
 1
2345678
9101112131415
16171819202122
23242526272829
3031 
Thursday 01st January 2004 01:29:50 AM

31/01/2004 - [ 六 ]
老啦...... 尋日踢左一場波就攰到今日, 無計, 無運動一排就乜都退化晒~


30/01/2004 - [ 五 ]

番學lu~ 我諗 bio 都可以好快教晒啦, 一個禮拜啦, 應該得, 好喲! 快D教晒, 快D操 past paper~

 

凸...... 班際輸左最後一場...... 籃球係咁, 足球又係咁...... 唉~ 算啦~ 輸左就係輸, 唔諗啦~ 讀書啦...... 入到U就仲有大把機會踢波打波, 入唔到就乜都無得玩啦~

 

決定左買一部 Holga 機玩下~ 應該幾好玩下, 未玩過菲林機喲~

 

今日等巴士果時見到一架滿晒人o既巴士埋站時, D人落車o既表情, 同埋仍然o係車上面o既人o既表情, 唔知點解好似好搞笑, 好似一罐沙甸魚俾人倒出黎咁......



29/01/2004 - [ 四 ]

越黎越多貓仔發現維園地上面D射燈係好暖~ 而家有兩隻貓仔會長駐o係D射燈度, 佢地D樣好鬼得意喲~~

 

聽日番學, 要踼埋最後一場班際足球. 成個假期都無運動過...... 死得......

 

D70 出左lu~ 勁到...... 成部D200咁...... 搞到我有D心動轉 Nikon...... 都係睇定D啦, 睇埋 Canon 部 1D Mark II 咩料先決定 Canon 定 Nikon 啦~



28/01/2004 - [ 三 ]
Bio 個 syllabus 真係唔俾人懶......


27/01/2004 - [ 二 ]

缺憾美~ 幾得意o既一樣野喲~ 一舊水o既 Holga 相機, function 少得可憐, 仲會漏光...... 不過就因為影出黎D相多左份缺憾美而變得更加有趣...... 真係幾得意~

 

呢個世界真係好正~ 好多好靚o既野, 當搵到一樣好靚o既野, 好鐘意, 但係見得多, 開始覺得悶, 突然無啦啦又會俾你搵到另一樣你覺得好靚o既野~



26/01/2004 - [ 一 ]

唔通經濟真係反彈, 今年無出去拜年, 但係阿爸阿媽收番黎俾我o既利是數量係少左, 但係質量好高, 得六封係廿蚊同五十蚊紙...... 好喲~ 咁我下兩個月o既學費就唔洗休啦~



25/01/2004 - [ 日 ]

呢兩日D雲都靚到爆~ 兩日都係火紅色o既 magic hour, 今日仲有一粒粒o既魚鱗雲~ 真係好靚! 不過見到魚鱗雲就即係聽日又要落雨lu~ 不過我想下個禮拜陰天, 因為想去梧桐石澗行下, 好耐無去lu, 都差唔多三年lu......

 

"And I love you so", 梁詠琪翻唱 Perry Como, 幾好聽喲~ 好似沒完沒了咁, 可以不停 repeat 咁播~ 呢幾日都播住首歌溫書, 幾舒服~



24/01/2004 - [ 六 ]

尋晚瞓得好差...... 天光都未瞓到......

 

無錯無錯, 做人應該係咁ge...... 先對人好, 人地對係唔好, 係果個人衰, 起碼自己對得住自己~ 曹操話"寧叫我負天下人, 莫叫天下人負我", 正好相反, 無ge, 唔同人有唔同生活方式je~



23/01/2004 - [ 五 ]

今日俾我發現左原來如果前一日夜瞓, 第二日要完全精神番, 係要瞓多好多粒鐘先補得番...... 唔怪之得平時番學咁眼瞓啦...... 不過根本無可能早瞓, 我都想呀! 不過唔洗溫書咩......


夜晚走左去睇煙花, 第一次現場睇, 同第一次影煙花, 都幾靚呀~ 同埋唔算太難影, 都可以預計到個構圖, 不過今日遲出去霸唔到靚位, 算啦~ 當係試下je~ 有機會再去影過~

 

呢兩日勁凍, 寫D字都鬼咁醜樣......



22/01/2004 - [ 四 ]

大年初一, 無乜特別啦~ 阿爸阿媽都係大阿哥大家姐o既好處就係新年唔洗去拜年, 等人黎, 不過o係香港D親戚都走得七七八八...... 其實唔洗拜年就最好啦~ 太煩啦~


無意中竟然俾我搵到全港學生攝影比賽o既資料, 不過...... 竟然要以8R去比賽!? 頂...... 我部機得3百萬象素, 點晒8R呀...... 慘...... 其實有幾張黑白相想拎去比賽, 不過8R...... 呢個可惡o既限制...... 唉...... 無架啦, 比心機讀書啦, 入到U或者可以叫老豆資助下我買部單鏡機呢~ 唔好再諗啦!



21/01/2004 - [ 三 ]

e...... 今日晴天啦~ 不過D霧竟然仲有幾勁下, 雖則已經比前幾日好, 但係都仲未到萬里無雲o既地步, 所以都無上到去寶馬山...... 究竟時機幾時到呢?

 

幾滿意兩塊 close-up filter o既表現~ 今日仲花左少少時間將個相簿執過, D顏色有番D style, 灰色, 我幾鍾意呢隻色喲~



20/01/2004 - [ 二 ]

今日再凍D, 不過無所謂啦~ 好期待放晴o既果日啊!

 

睇左19號o既星期一檔案, 好感動, 真係好感動, 原來有D香港人仲有D人情味~ 貧富懸殊...... 可惡呀...... 如果 ideal o既共產黨主義係實行到o既話, 真係比資本主義好好多!



19/01/2004 - [ 一 ]

chem 都教完書lu~~~ 爭bio仲未搞掂, 不過都好快啦, 放完假, 教多一個 cycle 就一定完啦~ 不過其實佢幾時教晒都係咁溫架啦~

 

今日放左學就同梁偉去旺角買 filter, 佢帶左我去間叫"中國冰室"o既茶餐廳食下午茶, 間野好有60-70年代 feel, 呢D咁o既舊舖真係買少見少, 幾值得搜尋一下邊度仲有呢類舖頭, 睇下感受下佢地果種與別不同o既風味, 幾好喲! 食完野就買野, +4 close-up filter 比想像中平, 但係可惜無 ND8 filter, 所以只係買左兩個 +4 close-up, 開心喲! 而家有PL, 又有 close-up, 好多野可以玩喲! 正!

 

近排禽流感越黎越勁, 得閒要去下街市影下相啦, 可能遲D街市會唔同晒樣...... 無晒鷄, 無晒田雞, 無晒魚...... 得番D生果, 邊怱似街市......



18/01/2004 - [ 日 ]

哈哈~ 求雨成功呀! 今日真係落雨呀~ 雖然唔算好大雨, 但係只要呢幾日都落雨, 跟住出一日太陽, 個天一定靚好多~ 天氣係就會凍左D, 但係唔係太緊要啊! 好想再上去一次寶馬山, 睇一睇完全清晰o既維港夜景~ 期待呀!

 

真係唔明白D人點解咁鍾意唔守信用...... 好討厭......

 

原來香港係有一個叫"全港學生公開攝影比賽"~ 不過上網搵黎搵去都搵唔到參加辦法......睇番前幾年o既比賽影集, 部分相片水準都算幾高下~ 好想試下參加, 睇下自己水平去到邊~



17/01/2004 - [ 六 ]
終於 upgrade 左個相簿啦! 無限量 upload 相, 開心喲! 下禮拜買埋D filter, 一定勁影相, 水, 光跡, 同埋最緊要D花仔, 都可以影得好D啦~


16/01/2004 - [ 五 ]

好討厭呀! 幾時先落雨架!? 今日仲要有超勁photochemical smog, 個天暗灰晒...... 有咩地方係朦朦地先靚o既呢? 樹林? 睇黎要睇下人地點影D霧啦......

 

好野! 彭海桐將會出新碟啦~ 首"Surrender"呀! 等左好耐啦! D配樂, 再加埋把勁甜o既聲, 真係正正正! 



15/01/2004 - [ 四 ]

番多兩日學就放農曆年假, 最後一個長假期喲~ 跟住番多半個月左右就 last day, 好快呀~

 

聽日要跑9分鐘, lunch 之前跑...... 跑多過30個圈就俾足面啦.....

 

SARS + 禽流, 人類邊夠D微生物玩呀......

 

解放, 關係的解放, 制度的解放, 肉體的解放, 慾望的解放, 思想的解放...... 道非道......



14/01/2004 - [ 三 ]

inorg 真係勁無聊, 吹水多過乜...... 唔好玩......

 

一首可以感動我o既新詩...... 都真係幾講緣份...... 跟住仲要遇上一個有寓意o既畫面...... 雖然機會率幾低, 但係唔係零就得啦~ poisson distribution啊!



13/01/2004 - [ 二 ]

今日無啦啦凍左好多! 好似話星期六日又會再凍過, 唔好凍啦, 我要落雨呀! 快D沖走D煙~

 

睇完兩本攝影雜誌, 兩本都有介紹 Leica 部 digilux II, 真係好鬼正, II就一定買唔起啦, 反而一部二手o既digilux就可以考慮下, 搞到我而家心大心細, 究竟買幾塊俾我部s30, 定係賣晒我手上兩部相機而換一部digilux呢??

 

感受可以刺激人思考同創作, 感受越深, 創作作品越有感染力......



12/01/2004 - [ 一 ]

平穩咁度過左20歲生日, 好彩可以安然走出學校門口, 感謝~~

 

放學去拎獎, 荔枝角, 好遠喲~ 上到去入左間office, 見到D得獎作品, 大部份都好pro, 有幾張真係好靚, 難以想像我D咁o既水平都有份...... 而且果個俾獎品我o既哥仔都覺得第一次比賽就有獎係好少有~

 

快快手賣左部獎品相機, 搵番一筆, 跟住就可以賣 adapter ring 俾我部 s30啦~ 跟住就可以去影瀑布啦~ 開心~ 遲D仲有兩個比賽, 一個好簡單, 另一個要寫下野~ 又玩下先~


 

買左一大罐餅乾, 夜晚唔洗肚餓lu~



10/01/2004 - [ 六 ]
食完 lunch 有人打我手提講: 郭先生, 你果幅"璀璨"被SONY攝影比賽選為優異獎, 請問你下星期幾時得閒上黎領獎?......" 嘩!!!! 勁開心呀! 我果幅鷄野都竟然有? 我自己都唔係太滿意喎~ 人身第一次拎攝影獎~ 值得紀念喲! 星期一去領獎, 幾好o既生日禮物呀!


09/01/2004 - [ 五 ]

呢個星期絕對係體能o既考驗, 生心都係...... 上完今日果兩堂連堂chem, 飛完個inorg, 個人就已經死左8成......

 

唔小心聽到林一峰首"今天應該更高興", 唔小心咁諗起D野......



08/01/2004 - [ 四 ]

放學番一屋企食左小小野就出去, 因為今日7B一大班人去睇畫劇"甜甜酸酸香港地". 不過睇畫劇之前約左梁偉同李樂豐去尖沙咀海旁諗住影下 magic hour, 但係太耐無落雨啦, D煙霞太勁, 所以都無乜好影, 跟住就去食地鐵站等埋其他人去食飯, 范小玲見我地去影相, 佢話有人話佢知我影相好@.@ 問我有無讀過art, 我話無, 其實我係曾經有一掛試過畫畫, 不過真係爆唔掂, 認真咁畫都畫得勁醜樣, 跟住我就知道自己唔o岩讀art...... 食完一餐廿二條友千七銀o既 pizza hut(范小玲真係幾豪......)之後就去睇畫劇. 首序曲交待得幾好, 一路睇就一路驚嘆D配角點解可以咁好戲, 我覺得最掂就係個福伯, 入形入格, D歌都好好, 顧家輝真係寶刀未老, 雖然套劇個結局唔係太好, 不過整體黎講真係唔錯~ 睇完畫劇就出去再影過相, 既然海景唔靚, 就向D人着手, 睇完本national geographic o既影相書, 當然要試多D影下人物, 影左幾張都幾滿意下o既相~ 開心~ 番到屋企成十二點,攰死人.......

 

個相簿果10mb話咁快就爆左, 係時候俾$$啦......



07/01/2004 - [ 三 ]

好攰呀...... 呢幾日都兩三點先瞓...... 今日放學仲要踢波, 夜晚又補習, 而且因為低 form 考試, 成間學校得番 form7 上堂, 勁 free, 一定勁踢波~ 都唔知好玩定好死~

 

嘩! 早排拎張相去參加"Sony新的香港,真的香港"攝影比賽, 今日收到e-mial話我入左最後階段!!! 第一次參加比賽就有機會贏, 勁開心喲! 不過張相其實唔算太好, 只係 magic hour + 銅鑼灣海旁~ 不過唔理啦, 贏到就驚喜, 贏唔到都唔緊要lu~



06/01/2004 - [ 二 ]
今日原本想放左學就去 Rosa 個葬禮, 打俾蘇浙D舊同學, 佢地竟然話朝早果陣已經完成火化...... 唉...... 想見下都無機會...... 唯有睇下考完試有無機會去拜祭下啦...... 我不會忘記, 我不會忘記的......


05/01/2004 - [ 一 ]

雖然話就黎廿歲, 但係估唔到咁快就要參加同學o既葬禮...... 一個上年蘇浙o既同學竟然話我知Rosa過左身...... 仲記得早排同佢icq傾計, 佢話入左音專, 我仲話要去佢果場畢業音樂會, 但後來知佢身體唔好退左學都真係好可惜, 但係完全估唔到走得咁快, 真係好突然...... 諗起許志安o係叱吒講過一句"時間係唔等人", 突然明白呢種感覺, 真係呀, 後悔係好好好無意義, 對一D事情黎講或者都可以再試過, 再努力過, 但係對人, 走左o既人, 你想講多句關心說話都無辨法...... 要對人好, 無論係親朋好友, 都真係唔好等......

 

1月3日, 會記得呢日
鴿子在翱翔, 天使在那兒玩着, 妳在永恆的時光中, 笑着
期待着的音樂會, 總有天會等到



04/01/2004 - [ 日 ]

他們彼此深信, 是瞬間迸發的熱情讓他們相遇, 這樣的確定是美麗的, 但變化無常更為美麗, 他們素未謀面, 所以他們確定彼此並無任何瓜葛, 但是此街道, 樓梯, 大堂傳來的話語...... 他們也許擦身而過一百萬次了吧, 我想問他們是否記得, 在旋轉門面對面那一剎, 或是在人群中喃喃道出的"不好意思", 或是在電話的另一端道出的"打錯了", 但是, 我早知道答案, 是的, 他們並不記得, 他們會很訝異, 原來緣份已經戲弄他們多年, 時機尚未成熟, 變成他們的命運, 緣份將他們推近, 驅離. 阻擋他們的去路, 忍住笑聲, 然後閃到一旁.

 

相信緣份, 可以減省唔少煩惱......

 

"舊香港, 新香港", 唔係D咩新意念, 但係我幾鍾意呀~



03/01/2004 - [ 六 ]

今日突登睇番D兩三年前o既日記, 睇番自己點預備會考~ 覺得自己好廢~ 唔係好溫書但係就對自己成績好有要求...... 而且好鬼心散, 諗D野都好幼稚~ 好彩, 經過左呢幾大事, 而家諗野都似番個大人...... 但係可能o係一兩年後再睇番呢篇日記, 又會覺得今日o既我其實都係好幼稚...... 但係睇番以前o既野, 明白左把握今天係好重要! 過去左o既野無得改變, 將來o既野又唔可以預計到, 唯一可以做o既野就係好好把握現在...... 只係剩低87日, 好好把握......



02/01/2004 - [ 五 ]

7B 真係無聊之霸! 今日玩"hi mean wrong 大菜", 即係兩條友對望唔準笑但係可以做D超奇怪o既面部動作引對方笑~ 表面睇好似好無聊, 但係其實超考定力同運用面部肌肉o既能力, 幾好玩喲~ 可惜今日無帶相機, 影唔到D勁扭曲o既面部表情, 不過唔緊要, 遲D實有大把機會影!!

 

林一峰真係好掂, 佢D歌好 fresh, 把聲都有D似張信哲~ 睇下可唔可以買番佢D舊CD先~



01/01/2004 - [ 四 ]

2004, 新一年, 只係想有兩個驚喜咁大把, 就算其他時間無咁開心都無所謂呀~ 兩個就夠, 兩個就夠啦......

 

今日咁o岩係舊曆生日, 幾好意頭喎~ 媽子俾左個利是仔俾我, 幾好幾好~~~

 

今日上左寶馬山, 好地方喲~ 又發掘出一個好地方喲~ 唔算太難行, 而且附近交通都算方便.上到去勁大風, 望落去真係可以望晒成個維港! 但最衰今日空氣唔係咁好, 能見度幾低下, 希望快D落一場大雨啦, 沖走晒D微粒, 個維港清晒o既話應該會好靚~~~ 一定會再去~

 

聽日就要番學, 珍惜啦, 時間所餘無幾......

Name
Security code
CAPTCHA Image Reload
Verify security code
Message