今日同梁偉返左鄧鏡波, 因為今年係波記40周年哦!
見返好多阿sir同miss~ 小玲老師問我畢業之後會唔會教書, 佢覺得我係好有愛心既人...... 喎...... 佢話佢以前都係超級內向, 不過開始教書之後, 對住班學生就唔會再係咁~ 講真, 雖然我都有諗過去教書, 不過我好清楚知道我真係唔識教人囉...... 而且我驚我好快會覺得悶...... 做 lab 唔同呀, 每次出 result, 就算係 negative, 都會有個刺激感~ 不過佢既建議...... 我會放o係心入面既.......
跟住又同 Mr Mok 傾計, 佢對我同梁偉影相D野好似好有興趣咁~ 佢又話有得讀PG就一定要讀上去, 出左黎做野之後就一定唔會回頭....... 講到好似好唏噓咁......
去左 chem lab 同 bio lab 參觀, 有D師弟 demo 實驗, 不過見到佢地用中文, 因為佢地係母語教學, 好似好奇怪...... 而且見到個 fume hood 仲係木黎既, 感覺超怪......
又見到樹喜老師, 佢 show 左本陸運會既場刊畀我睇, OMG! 我個 B grade 跳高紀錄竟然仲o係度!!! 仲未畀人破....... 奇聞!
跟住見到章 sir, 佢而家走去教 history...... 講真, 我會讀 bio, 某程度都係因為果時 form 3 畀佢教左年 bio, 佢真係教得好好....... 而家佢教 history...... 佢個課室 show 左D展板, 講灣仔 local 文化~ oh! 由於太o岩 channel, 傾左好耐~ 講 globalism...... 講和昌大押變香港大三巴...... 好有意思ma~
一場黎到, 當然要周圍行下, 去左天台, 圖書館, 操場, 都無乜點變~ 見到余旦強, 個so call 校長, 仲係咁廢...... 臨走時見到簡 sir, 佢無啦啦講左句, "咁快就十年, 時間過得真係快, 我已經38歲......"! 係囉, 時間真係過得好快, 我 form 1果時係30周年, 而家返去已經40周年...... 十年人事幾番新...... 而家D波記仔比我地果時D薯仔形好多...... form 6果陣時既陳永基 C grade 跟我地打波, 而家已經係 A grade, 仲要同我一樣咁高咁大~
我都就快大學畢業...... 不過我仲好記得小學中一派位果日, 知道自己會去鄧鏡波, 第一次去到鄧鏡波門口, 見到間學校咁細, 仲細過我間小學, 感覺好奇怪...... 不過到左而家, 對鄧鏡波真係好有感情......
有大量照片, 等我同梁偉D菲林沖好再 upload~