沖繩の旅行程簡介: Day1  Day2  Day3  Day4  Day5  Day6  Day7  Day8  睇相  有用連結

第七天行程 31/5/2008

民宿喫茶南の楽園 à 具志川城跡 (其他網 (1) ) à 喜屋武岬 (平和の塔) à 白銀堂 à 琉球玻璃村 à沖縄平和祈念堂 à化文化王国・玉泉洞 à 斎場御嶽 à 國際通 à Lunch @ 沖繩三越 à 平和通 à 市場本通 (第一牧志公設市場)(牧志公設市場) à ASHIBINAA Okinawa Outlet Mall à 東橫 Inn (新都心) à Hamby 自由市場 à Dinner @ Hot Pepper (つレストランかつの膳ハンビー店) à 東橫 Inn (新都心)

住宿 : 東橫 Inn (新都心)

今日嘅行程比較豐富Ｄ，所以尋日就同館住夫婦講要7:30食早餐，不過另外嘅一對日本夫婦重早過我哋食早餐 ! 呢個早餐雖然係簡單Ｄ，但係都幾美味 ! 食完早餐執好晒Ｄ嘢就 Check-out 走人，臨走前重同館主影返幅合照添呀 ! 我哋今日第一個去嘅地方就係一個叫具志川城跡，原來都幾近間民宿架 ! 不過去到呢….見到就係一堆爛石係到，返去香港先知原來要行落去近海邊嘅地方先係個個城跡所在地。但係點解我哋無入到呢 ?! 因為入去條路都生晒草，基本上都唔會謂意到係可以行到入去。之後就埋附近嘅另一個景點喜屋武岬到睇睇，呢個景點又係係附近，所以好快就去到啦 ! 呢一個景點我諗其實應該無咩人會來睇，因為係得個崖邊同埋一個涼亭重有一個紀念埤….但係因為我哋去嘅時候陰天陰地，所以可能咁樣唔覺得靚呱 ! 睇完呢一個，就去睇下一個叫白銀堂嘅地方。呢個白銀堂其實同我哋嘅天后廟嘅作用一樣，係祈求出海嘅漁民安全同埋魚獲豐收 ! 但係白銀堂呢個名係有由來嘅，原來有個沖繩漁夫向一個武士借咗Ｄ錢，中間有Ｄ細節日文唔知道講咩….不過最後係將Ｄ錢埋咗係呢個白銀堂到。重有就係呢個白銀堂有時會舉辦Ｄ慶典架 ! 跟住我哋就去睇沖縄平和祈念堂喇 ! 係去呢沖縄平和祈念堂途中經過琉球玻璃村，咁就順道入去睇下，呢個琉球玻璃村主要係可以俾人試下整玻璃，其實係沖繩都有好多地方俾人體驗一下點樣可以整到Ｄ玻璃，入面重有一個地方可以俾你買下Ｄ玻璃嘅製品 ! 我哋係入面買咗Ｄ嘢之後就繼續向沖縄平和祈念堂出發。去到嘅時候，都無咩人，我哋係附近影下相同行下就走人喇…呢個沖縄平和祈念堂其實係用來悼念一Ｄ係戰爭中死亡嘅人，入面有個館放咗有關嘅資料…有興趣嘅人可以睇睇呢….不過人哋就無咩興趣喇…..睇完呢到，我哋就去今日嘅重點，就係文化王国・玉泉洞，呢個係有兩個景點來架。去到嘅時候，呢到要買入場卷，用係Ｄ書到Coupon就有10% 嘅折扣啦 ! 開頭用咗另外一張，點知佢淨係俾咗每人一樽星之砂俾我哋喎，咁我又攞另外一張Coupo出來啦，原來只可以得一種優惠，咁我哋梗係揀 10% Off 啦 ! 我哋首先就係去睇下呢個玉泉洞先，呢個玉泉洞其實係一個幾大嘅鐘乳石洞，要行成半個鐘先行得完。入面Ｄ鐘乳石奇形怪狀，都幾得意，不過就成日中頭獎，因為個洞入面Ｄ石會不停咁滴水，一路行就一路中….睇完呢個玉泉洞，我哋係去睇近住路行嘅文化王国，其實呢個文化王国係沖繩又係周圍都有個Ｄ，俾你體驗下沖繩嘅文化，試下做Ｄ嘢咁 ! 重有有個沖繩傳統嘅鼓舞表演，都幾好睇 ! 睇完個舞就入去睇下有無地方食Lunch，入面有個地方係買下Ｄ手信同埋有個食堂，係買手信嘅地方少不免更係有得試食啦…又可以食下嘢啦 ! 入面個食堂Ｄ嘢食無得點選舉，同埋價錢都幾貴下，所以我哋決定出去先食 ! 係睇呢一個文化王国・玉泉洞又遇到係沖縄美ら海水族館入面幫我哋影相嘅一對日本情侶，哈哈~~~咁都遇得到，我哋真係有緣啦 ! 上返車睇下Ｄ書仔有無Ｄ咩食店推介，附近又無咩喎….但係就睇到一個景點係附近好近下，就係斎場御嶽，御嶽係祭祀神話中的神明或者係祖先嘅地方，有部分嘅御嶽係只有女巫先可以入去。於是乎我哋就去呢個地方出發啦，去到嘅時間見到有一間資料館係到，但係個入口就唔見咗，一定要經過個資料館先至可以睇到個斎場御嶽，即係話你上睇個斎場御嶽就要俾錢入個資料館先 ! 即刻有種返咗大陸嘅感覺….老屈 ! 我都唔需要睇Ｄ資料，但係就要俾錢去個資料館….唉…所以我哋就無入到去睇呢個祭祀嘅地方啦….跟住就去搵嘢食啦…我哋就諗住去國際通搵食喇 ! 去國際通有個問題就係唔泊架車係邊到，其實入面都有Ｄ收費停車場，但係價錢都幾貴下，所以我哋就盡量搵下有無Ｄ可以唔洗俾錢嘅地方喇，終於都俾我哋搵到個地方係國際通嘅街尾附近可以免費泊車 ! 泊低架車就去搵食啦…搵咗一陣，因為時間都唔早，所以就係三越嘅頂樓到開餐啦….都係沖繩料理….!! 食完飯就行下國際通睇下有咩買啦…點知成條國際通好似呢個手信街一樣，間間舖頭買咗嘢都差不多，所以感覺無咩睇咁 ! 反而覺得兩條橫街平和通同市場本通重多Ｄ嘢睇…係市場本通入面重有個(第一牧志公設市場)(牧志公設市場)，頭先食Lunch時唔記得入面有個飯堂，如果唔係就係呢到開餐啦….係平和通入面又一間幾大下嘅藥房，入面都幾多嘢買，價錢有Ｄ都幾抵個喎 ! 睇完晒呢個國際通，我哋就ASHIBINAA Okinawa Outlet Mall，去呢個Outlet Mall其實都幾複雜，因為個GPS又係無資料，呢個Outlet嘅地方其實係填出來嘅，所以如果資料唔Update跟本就係搵唔到…揸住架車去到附近我都覺得奇奇怪怪咁，點解會行埋Ｄ羊腸小徑咁 !? 話晒都係一個Outlet Mall呀嗎 ! 好在知道呢個 GPSＤ資料唔Update，所以一路揸一路留意附近環境，其實我去到附近我就見到其中一個Outlet Mall嘅Logo ，但係個GPS 就唔係指住呢個方向個喎…人工智能GPS又要出動，去到個Outlet Mall睇返個 GPS發覺原來我哋身處於海中間….. 呢個Outlet其實唔係好大，一陣間就行完，因為入面Ｄ嘢唔係真係咁平，香港都有得買 ! 係呢個地方重有其他唔同嘅 Outlet Mall ，不過買Ｄ嘢唔係咁啱我哋呢….好啦~~睇完個 Outlet 我哋就要去搵晚餐食，其實我哋係諗住去一個叫做 Hamby 自由市場嘅地方睇下順便食埋嘢，因為有Ｄ旅遊書寫入面有Ｄ嘢食。呢個Hamby 自由市場其實係一個每逢週五、六、日開市嘅跳蚤市場，有牛仔褲專賣店、T恤店、骨董店，重有沖繩麵食、南美食物等攤販等，各形各色的店家羅列於此。呢個市場係十年前，係開係美軍機場舊址，現在已成為北谷的名勝。雖然有Ｄ店家在周日都開工，但係週末夜晚會更加多嘢買，所以都吸引咗唔少人去睇睇。但係我哋到咗之後發覺完成唔係想像中咁嘅地方，重要得個幾檔開咗，完全係無嘢睇，不過呢一個自己市場係分開咗兩個地方嘅 ! 另外一面都係咁，但係就不停咁有人來個喎，攪到周圍都泊晒車。因為唔係想像中想睇嘅嘢，再加上又落雨，我哋就撤退喇…睇下附近有Ｄ咩食先，周圍搵搵下搵到一間叫 Hot Pepper食豬排同埋沖繩料理嘅，Ｄ豬排都幾好味 ! 食完係返去酒店，但係返酒店之前要去對面嘅 San-a Main Place 到買Ｄ嘢，開頭重驚佢會閂咗門添，後來先知原來呢間San-a Main Place係開到成夜晚12點架 ! 買完嘢就返酒店休息 !