沖繩の旅行程簡介: Day1  Day2  Day3  Day4  Day5  Day6  Day7  Day8  睇相  有用連結

2008沖繩八日自駕之旅

沖繩概況:

沖繩位於日本本島的南面，又稱琉球。成個沖繩本島唔係好大，要揸車由南部去到北部都係大概2~3個鐘。週圍重有幾個島，要去一係搭飛機一係就搭船。沖繩天氣都幾唔穩定，一時就曬到你死，一時就係咁落雨。所以去沖繩一定要帶傘，唔係就瀨嘢…..去沖繩主要都係睇風景、古蹟同埋玩水上活動。不過如果要玩水上活動一玩就會一日，同埋唔知點解係沖繩嘅人英文唔係咁靈。

食

至於食方面就完全同日本其他地方唔同，唔好諗住沖繩係好多海就好似北海道咁好多海鮮食，迴轉壽司唔係好多間，食魚生嘅都好少。反而Ｄ咩沖繩料理(即係好似中華料理)嘅就有好多喎，我諗呢個都係因為受到中國文化嘅影響。

交通

交通方面，係沖繩市中心有條 Monorail ，可以去晒沖繩主要嘅地方好似那霸(Naha)為中心點一帶嘅地方。如果要去其他觀光景點的話，佢哋本地有Ｄ One Day Local Tour，會帶你去Ｄ唔同景點參觀。如果要自己去的話，一係就搭巴士，但係Ｄ班次就好疏，Miss 咗一班的話，就大煲…要搵Taxi。另外一個選擇就係自己揸車，佢哋有好多租車公司提供租車嘅服務俾你，重要係全日本最平嘅車租，一架1300~1500c.c.嘅車圍起數來到係二百蚊港幣多Ｄ一日，因為星期六、日車租會貴Ｄ，如果可以安排到星期一至四租的話價錢係唔洗一百蚊一日 ! 不過我係講緊車租，係日本租車一定係會要你買保險，個保障價錢係星期一至日都一樣 !

住宿

好啦，講下住宿先。係去日本嘅人都知有間叫東橫Inn嘅酒店，係沖繩唔係好多間，不過大部份都係係Monorail 站附近，不過係那霸市中心都有好多其他嘅選擇。去到中部至北部同埋南部就唔同。中部至北部同埋南部都係趨向於 Resort 式酒店，因為有好多沙灘。

購物

購物方面就唔同其他日本嘅地方，因為無咩特別名牌嘢買。有條叫國際通嘅街，位置那霸市中心，成條街都係買手信，差不多間間一樣。反而有兩條橫街，一條叫平和通，而另外一條叫市場本通重多嘢睇Ｄ !

重有就係沖繩有好多間吉之島，每一個區都有一間咁濟，重要有規模唔細，但係大極到係得兩層 ! 其餘嘅重有100Yen Shop ，重有Ｄ 100Yen Plaza ，真係好大間架 !