Day 3  (29-10-2008)

National Park Village à Wanganui à Durie Hill Elevator à Alma Motel & STONZE Restaurant, Cafe & Bar

住宿 : Alma Motel & STONZE Restaurant, Cafe & Bar

今日整完晒所有行裝之後，就去整返個美味嘅早餐食下先，來咗幾日都無食過熱嘅早餐喇 ! 個早餐係炒蛋煙三文魚再加麵包。出到去整早餐嘅時候，都見都幾多宿友係到整早餐食 ! 食完早餐就出發去 Wanganui ，點解去呢個城市呢 ?! 因為呢一個係一個中途站，原先睇由National Park Village 去 Wellington 個車程都幾耐下，所以就係中間揀一個城市駁下腳。不過今日係好大霧同埋有Ｄ霧雨，所以車速都唔可以開得太快。去呢個 Wanganui 嘅路程大部份都係行山路，又好多彎，好似係大霧山揸緊車咁 ! 到咗呢個Wanganui 之後個天氣又轉返好好多，不過都幾多烏雲同埋幾大風下 ! 呢一城市其實都幾近岸邊，係城市嘅中間俾一條大河道分開兩邊，另外就係好大風，係吹得郁人個種 ! 去到呢個 Wanganui 大約係十二點到，首先就係搵下間 Motel 嘅位置，之後就去呢個市嘅市中心到食飯個午餐。不過見時間尚早，於是就係呢個市到兜下，兜兜下去咗呢個市嘅一個景點，個到有一部好古老嘅升降機叫做Durie Hill Elevator，本來想搭下，但係就要俾錢搭，所以就無試到。呢部升降機係係1919年興建嘅，重要係一部公共嘅升降機來個喎 ! 呢一架升降機其實係連住一條隧道，叫做Durie Hill pedestrian tunnel，之後就會去到一條叫 City Bridge 嘅橋，一路行就會去返市中心。不過我哋無去行呢條隧道，因為要落返去先得，同埋發覺係紐西蘭泊車好多地方都要俾錢架…..! 之後就上咗係附近嘅 Durie Hill Memorial Tower，呢個 Durie Hill Memorial Tower 有33.5m 高，總共有191級，係個頂上面可以睇到附近嘅景點。但係我哋上到去，只係覺得好大風，如果有一對翼的話，就可以飛上天 !

 睇完呢個景點之後，我哋就去咗市中心嘅一個 Shopping Center 到食 Lunch，食咗個 McDonald 餐同埋一間叫 Milkshake 嘅餐，嘩~~~個 McDonald 餐要成五十蚊港幣咁濟 ! 真係幾貴下 ! 食完就去 Motel 到Check in，然後就去咗市中心到行街，行行下重買咗兩支蜜糖添呀 ! 本來想係附近到睇下有咩嘢睇，但係如果要睇就要去好遠下，返到香港搵返Ｄ資料原來呢個市附近有Ｄ嘢睇下個喎 ! 然後我哋就去 Countdown 同埋 Warehouse 嘅超市到買今晚嘅晚餐，今晚係食西冷加Ｄ蔬菜。間Motel房其實都幾大間，重有Ｄ簡單嘅廚具，不過就無風筒同埋大門同廁所係用玻璃，感覺上覺得會有人望入來咁 ! 重有就係呢間 Motel 本身有一間餐廳，係食石頭燒嘅….都幾多人幫襯咁，重有就係呢到可以免費上網架…總括來講都唔錯。