一早瞓醒就要去霸個公共廁所用，因為唔知點解尋晚好夜嘅時候多咗幾個住客入住，呢Ｄ公共設備真係要等先有得用 ! 刷好牙，執好晒嘢就等食早餐，其實先前問過可唔可以早Ｄ食早餐嘅呢 ? 因為我哋今日要去首爾，車程都幾遠下，個後生仔話唔得，定咗係8:30唔會改 ! 好在我哋就第一批用個廁所啫~~~之後個Ｄ都要係到等，不過只係女個邊要等咋~~~男呢邊係唔洗等嘅。執好晒Ｄ嘢，就係呢近同樂園入面應下相喇，因為其實都無實際睇過~~~之後差不多8:30就有個亞豬媽係到叫，我諗係佢哋已經準備好早餐呱，食早餐嘅地方係係另外一邊嘅。呢個韓式早餐其實都好簡單，有魚、菜、湯同埋食韓國嘢唔少得嘅配菜啦~~~基本上都幾好味 ! 食完呢一餐，我哋就要出發去今日第一個景點喇，就係叫做華城行宮，係位於水原市。由我全州去呢個景點要成三個鐘嘅車程，去嘅路程都無咩特別，但係唔知點解行行下就開始塞車喎 ! 重要係唔知點解個隻~~~~去到呢個水原市都成11:30喇，於是我就搵個位去泊低架車啦 ! 去睇呢個華城行宮係要俾入場費，承惠每位1,500won啦 ! 去到門口先知原來呢個華城行宮係因為拍大長今而搭建出來，拍完之後就變咗做一個景點喇 ! 入到去本來想搵個廁所方便一下，不過入面係無廁所嘅 !

裡面有Ｄ位置係大長今係邊個位拍過，就會有個佈景公仔放咗係到，都幾得意 ! 睇完呢個原來行出去重有個位係要行上山嘅，不過團友們無咩興趣，所以就無上到去喇。之後就要搵個地方食Lunch啦，係泊車附近有間食店係食餃子嘅，於是我哋就食呢一間啦 ! 我哋叫咗兩個餃子，一個有湯，一個就無湯嘅同埋一碗海鮮麵 ! 嘩~~~其中一款餃子係用泡菜包架，食食下就會覺得好辣~~~最好食嘅就係個海鮮麵 !

今日係旅程中最後一日揸車嘅日子，我哋睇完大長今嘅華城行宮之後，就要向首爾出發，車程大約係一個鐘之內就會到達首爾市~~~~去到首爾第一個景點就係去63大廈喇 ! 但係未到首爾市就開始塞車喇，通常係市區嘅地方都係咁 ! 本來想搵個位去泊車，但係兜來兜去到搵唔到車位，最後我哋就無去到呢個 63 大廈。跟住我哋就去汝矣島到睇櫻花啦，因為其實就係隔離，好近 ! 但係係一路行就一路睇到越來越多人，重有就係個漢江公園點解會變咗一大達黃泥地嘅 ??? 都係唔理咁多喇，搵個地方泊車先 ! 但係兜來兜去都唔見有地方泊車嘅，好在行行下都見到，但係就Miss咗個路口，要兜個大圈返去個停車場。嘩~~~係呢個時候，要過一個路口都唔係咁容易，因為Ｄ人多到呢，過馬路係無停過咁有人行，咁啱呢個路口又無燈位喎....等咗幾耐先過到呀 ! 最後都入到個停車場~~~我哋就快手快腳去睇下呢個汝矣島啦，話時話，真係好多人，令我覺得好似行緊年宵市場咁 ! 想影張相都幾難，要影就會有好多人做佈景板喇 ! 呢個汝矣島Ｄ櫻花其實都開晒，有Ｄ開始跌落來添呀 ! 如果要睇最靚嘅時候，可能早多一至兩個星期會好Ｄ，好在我哋睇咗唔少櫻花啫 !

睇完櫻花，我哋就要去首爾嘅住宿到 Check-in，又係個GPS到入資料~~呀~~好嘢喎 !有資料個喎 ! 揸去呢個 Amgia Motel 之前，我哋先去還車嘅地方到睇睇點去，去到個到附近大約知道位置之後就去Motel喇。呢間Motel係係Ｄ橫行入面，所以部GPS帶我哋去到附近就話到咗，但係我睇來睇去都搵唔到間 Motel 喎 ! 於是我就落車周圍睇下有無啦~~搵來搵去到搵唔到喎，個時呢又好急喎 ! 但係又無廁所係附近喎~~~嘻~~~你哋唔好諗我會隨地屙嘢嘅人來先得架，我都係忍。搵搵下見到個好似郵差嘅人，於是我就問佢Amgia Motel，呀~~~佢真係知係邊個喎 ! 原來就係我搵再過多一條行就到 ! 於是，我就多謝佢喇，行去睇下係唔係喎 ! 入到去呢間 Motel ，Confirm 咗喇，我就去揸架車來附近啦，架車唔可以直接入去呢間Motel，因為Ｄ路好窄，間車又大喎 ! 嗱嗱聲 Check-in 完去解決個問題先 ! 呢間 Motel ，入到去空間都幾少，Ｄ團友話似時鐘酒店，我哋住係7樓，一層樓有4間房。我住個間有Internet同電腦可以上網，呀老板個女重專登同我講有電腦同埋Internet嘅要貴Ｄ架，不過就無收多到我錢 ! 我當然係要Thank you 佢喇 ! 老板兩夫婦英文就唔係咁好，但係小姐Ｄ英文就可以個喎 !

休息咗一陣，我哋就要去還車喇，其實還車嘅地方就係東大門個到其中一棟大廈。雖然先前去過，但係我哋無入到去個還車地點。去個個一棟大廈到，又見唔到任何 Avis 嘅 Logo 喎，就問個 Security 哥哥仔喇，佢指我哋落停車場。我哋落到去到個哥哥仔話個層但係又係唔見喎，又係一個牌都無 ! 大家正係到講係唔係係呢個停車場架，準備兜去第2度嘅時間，就係轉角嘅一個位到見到Avis 個一個牌啦 ! 泊好架車，攞晒我哋所有嘅嘢出來，就去個 Office 到話還車，等咗一陣有個職員就同我一齊去 Check 車，Okay 無問題~~~走得 ! 臨走時就同架車影返幅相先，話晒到揸咗三日，重要係由釜山上到來首爾架嗎 !!