2009 韓國自駕之旅遊記 Day 6 -- fotop.net photo sharing network

2009 韓國自駕之旅遊記

Day1 Day2 Day3 Day4 Day5 Day6 Day7 Day8 Day9 Day10 Day11 睇相 有用連結

Toyoko Inn > 馬耳山公園 > 全州 > Home Plus Store Lunch > 豐南門 (假嘢) > 慶基殿 > 全州韓國村 > 同樂館傳統韓國住宿 > 校洞韓食 Dinner > 同樂館傳統韓國住宿

今日就要離開釜山驅車向全州方向出發，係去呢個全州之前，我哋會順道去睇下呢個馬耳山~~~資料話有好多櫻花睇個喎 ! 於是我哋就計畫去呢個馬耳山一遊喇.....原來由呢個釜山去馬耳山都要成差不多三個鐘先去到~~~~呢次我諗個 GPS 一定會帶我哋行IC路，果然不出我所料，真係全程都係行IC路。呢段IC路唔知係唔係因為長途嘅關係，每隔一段路程就會有一個休息站(有去過日本或者返內地搭長途車嘅朋友，你哋應該知係咩來嘅呢 !入面可以食下嘢，去下廁所、入下油、買下嘢食 )。我哋行咗一個鐘到就入咗去其中一個休息站方便方便喇...之後就繼續我嘅旅程，係過完一個隧道之後，一出就見到兩個山好似一樣嘢咁~~~就係馬耳...我哋終於都到咗馬耳山喇 !

揸到去個馬耳山個到嘅時候，又見到一車車嘅學生係到 ! 唔通真係韓國嘅學生旅行旺季 ?? 去到要泊入個停車場入面，停低架車我哋就四圍行 ! 但係都唔係好見到有櫻花嘅綜影，於是我哋就係附近Ｄ舖頭到行行，重食咗條冰條添呀~~~都幾好味 ! 行過重同Ｄ韓國學生影張相，佢哋全部都係擺同一個姿勢 ! 呢個馬耳山，近睇好難睇到馬耳嘅形象，要遠先睇到 ! 返到香港睇返呢個馬耳山嘅資料，先知道原來呢個山又係要行先會有嘢睇，唔怪得之我哋睇唔到嘢喇.....重有要行嘅都唔少路個喎....有90分鐘至到240分鐘嘅路程到有....如果鍾意行山嘅人真係一個唔錯嘅地方 !!!

睇完馬耳山之後，我哋就要去睇下全州其他嘅景點喇....有一個叫做豐南門嘅地方 ! 去豐南門就係正式踏入全州嘅地帶喇。去到全州市嘅時候個GPS帶咗我哋去一棟好似市政府大樓嘅地方，但係呢Ｄ又無位泊車喎 ! 我周圍兜來兜都無，所以就揸咗去另外一邊睇下有無位可以泊車喇 ! 哈哈...咁啱附近有間叫Home Plus 嘅百貨公司喎....通常呢Ｄ都係有得免費泊車個喎，咁我當然係揸入去泊低架車啦~~~由於時間都唔早土咁啱我哋又見到入面有個 Food Court 喎，當然係醫咗五臟廟先啦 ! 但係係去呢個 Food Court 嘅途中有團友已經被入面嘅護膚品公司吸引咗入去，重有收穫添~~~未到首爾已經開始進入作戰狀態喇 ! 買完嘢就去個 Food Court 到喇，呢到入都幾多款式揀下，但係有時太多都唔係一件好事，因為會花多眼亂 ! 最後我哋叫咗三個 Set ，嘩~~~~原來Ｄ份量都幾多下，夠晒4個人食呀 !

食完呢餐美味嘅午餐之後，我哋就行過去呢個豐南門喇。其實呢個豐南門我覺得有Ｄ怪怪地，因為佢係一棟建築物入面，我哋以為係因為呢個豐南門重建所以先將佢溶入去一棟建築物到添~~~後來我哋睇到真嘅豐南門先知原來呢個係假嘢......咁究竟呢個係咩來嘅呢 ?

睇完呢個假嘅豐南門之後，我哋就揸車去睇一個叫做全州韓屋村嘅地方。原來都幾近下個喎，唔洗15分鐘就到咗喇。搵個位泊低架車之後就周圍睇嘢喇，我哋架車就泊咗係一間造紙嘅韓屋門口，其實呢個韓屋村基本上係以韓國照舊時嘅屋起，然後好多都係會前舖後居咁，非常有特色，絕對推介各位睇到我呢一篇嘅人去參觀下。不過，全州嘅交通唔係咁方便，大家可以考慮一下另外一個間首爾嘅韓屋村，叫做南山谷韓屋村，不過我無去過唔知道係咩樣~~~如果大家去過就話我知喇 !

全州韓屋村其實係匯集咗七百幾間嘅韓屋，號稱韓國國內最大規模嘅傳統韓屋村，更有好多古蹟座落係村落中。哦~~~都係講返我哋嘅旅程先，我哋一見到呢Ｄ咁有特色嘅嘢，當然就係到不停影相啦。影完本來想行入去睇下呢間造紙嘅韓屋，但係我哋睇睇下佢好似唔招呼客人咁個喎，於是~~~最後我哋都無入到去。轉個灣，我哋就去咗呢個旅客中心攞咗Ｄ資料，然後就係都四處睇嘢、影相，有Ｄ韓屋入得嘅我哋就走入去睇嘢 !

呢個韓屋村其實真係幾多嘢睇，如果大家真係去的話，可以花2日時間係到遊覽下，講返我哋先，我哋一路行一路睇，行行睇地圖去咗一個叫"慶基殿"嘅地方。睇落去又唔係好遠個喎....咁我哋咪行去睇下喇....呢個慶基殿係免費參觀架 !

慶基殿係朝鮮建國後，為咗恭奉太祖於六百年前建造的。係以前任何人經過呢到都一定要下馬，而且嚴禁雜人入內。但係現在呢到已經變成公園一樣的地方，非常有趣。

入面其實都有Ｄ似中國嘅大夫第放咗Ｄ歷任皇帝嘅畫~~~入面都幾大下，我哋重以為呢個就係慶基殿添 ! 原係個慶基殿係係隔離架...好在...唔係就會睇漏嘢...呢個慶基殿入面有Ｄ比較細間嘅韓屋，入面主要係放一Ｄ日常用品，不過就無得入去睇，只可以睇到間屋嘅外咋 ! 睇完呢個慶基殿，一行出去就會見都一棟好有歐洲式建築嘅教堂 ! 睇地圖原來叫殿洞聖堂，都幾靚個喎...不過其實都幾得意，一Ｄ古式嘅韓國建築物同埋一Ｄ歐陸式嘅建築物放埋係一齊 !!

睇完呢個慶基殿同埋殿洞聖堂之後，打開地圖一睇，咦~~~~點解呢到又有個豐南門嘅 ??? 睇落去過條馬路就到，於是我哋就行過去睇下喇 ! 哦~~~原來真係有個豐南門架~~~咁我哋先前去個個係,咩來架 ??? 唔理咁多，都係睇咗先啦 ! 呢個豐南門同個Ｄ東大門呀~~~南大門呀，差不多...都係一度城門咁樣 ! 不過無得入去睇嘅 ! 睇完我哋就睇下地圖有咩睇啦~~~附近有一個叫全州客舍嘅嘢睇，睇地圖到幾近，但係行行下其實都要行成20分鐘到先到 ! 全州客舍係古時見國王嘅地方，同埋係俾當時朝廷入面Ｄ大官留宿同埋傳聖旨嘅地方。家下睇到只係得主棟個一部份係開放俾人睇，重可以俾我哋坐係到休息下囉....其實都無咩特別~~~~

我哋係個條購物街到都逗留咗唔少時間，都係時間要返去攞車，然後就Check-in啦....原來泊車嘅地方都幾近我哋今晚住個間韓屋，叫做全州韓屋體驗生活館，呢個係我係網上面Book嘅，一去到呢，就見都有位老伯係到招呼緊一Ｄ韓國人，睇個樣係Ｄ先生同學生，唔知係唔係畢業旅行呢 ? 我哋等咗好耐，俾張Book嘢嘅記錄佢睇，點知佢就打開一本簿表示今晚無晒房 ! 吓，唔係呀嗎 ? 我同佢講你哋Confirm咗個喎，點解會無嘅 ! 跟住佢就打電話，我聽到佢同電話入面個人講話Internet，可能係由網上面Book嘅有另外一個人負責都唔定，以呢個人又無係本簿到做記錄 ! 但係我哋無得住，咁點算呢 ? 之後呢位老伯就再打電話喇，跟住就同指我哋去另外一個地方，我哋諗佢應該係幫我哋係附近搵一間住，係咁嘅情況下我哋唯有去佢介紹個一間喇，係我哋走個時，個個老師同Ｄ學生啱啱返來，個老伯同佢講咗幾句嘢，個老師無神神同我哋講"Sorry"喎 ! 可能係個老怕話我哋本來係住係呢到，點知就俾你哋住咗~~~個老師先同我哋講"Sorry"呱 ! 我哋沿住佢指嘅方向同地址去到一間叫"同樂園"嘅韓屋 ! 我哋話係個老伯介紹來，有一個後生仔識得講英文，於是我哋就話要兩間房要有廁所嘅 ! 點知佢介紹一間係 VIP 房來嘅，要成150,000won一晚 ! 吓 ! 唔係呀嗎~~~我哋原先個間都係 160,000 won 有兩間要有廁所添個喎 ! 於是我哋就問佢可唔可以4個住一間呢 ? 佢話唔得，因為呢個價係包埋早餐，唔要早餐都係減30,000won~~~唔係好化算 ! 於是我哋問佢有無平Ｄ嘅呢 ! 有，50,000一間~~~不過廁所就要用公用嘅~~~因為有Ｄ團友覺得好唔方便想要有廁所間VIP房，但係真係唔係好抵 ! 於是，我就係附近再搵下，點知好多都滿咗。大家相量過之後，就租咗喇。跟住就出去搵食喇，係我哋頭先周圍行個時，叫做"校洞韓食"好似幾好味，咁就去呢一間喇。我哋睇咗個Menu，然後就點咗4個Set....嘩~~~Ｄ配菜真係有好多 ! 韓國食品....都係辣....呢一餐都有幾多樣嘢都係辣嘅，但係就幾好味 ! 食完嘢我哋就返去呢一間韓屋啦。其實呢一間韓屋，都幾有特色，Ｄ房真係幾細間下，只係鋪到一張被就無位 ! 我哋以為可能幾凍啦~~~原來地下有暖管，夜晚重覺得好熱添呀 !!