好喇....行程到已經過咗一半啦。今日嘅行程就係要去鎮海市睇櫻花~~~真係要唱返幾句~~~Sakura~~~Sakura~~~Sakura~~~

好....今朝係係東橫Inn到有免費早餐食，住過日本嘅東橫Inn嘅朋友都知道佢哋嘅早餐都叫Okay，唔會有太多款式，但係一定食得飽你 ! 究竟韓國嘅係點嘅呢 ? 原來都係以壽司同埋飯團為主，重有麵包同埋沙律食~~~呢Ｄ都係任你食嘅 !

食完嘢就出發去我哋嘅景點，由我哋住嘅地方去鎮海市要大約1個鐘到 ! 呢一次呢個GPS去唔知會帶我行Ｄ咩路呢 ? 揸去嘅時間一路到行一Ｄ高速公路，但係又唔洗俾錢喎，都幾好 ! 不過其實我都已經揀咗係行唔收錢路段去目的地，因為我覺得行Ｄ高速公路係無咁多嘢睇架  !

鎮海市每年都會有櫻花祭，係櫻花祭嘅時間，海軍軍營係會開放俾大家去睇嘅，不過我哋去嘅時候個櫻花祭已經完咗喇 ! 大約一個鐘就到咗鎮海市喇....今次輸入嘅座標係鎮海市政府，因為輸入其他嘅資料個GPS係搵唔到~~~去到個政府大樓我哋就泊好架車想入去睇下，查實係想去方便一下啫~~~~不過入到去睇來係無得借廁所用，咁我哋就影下相去另外一個地點，今次我就入一間民宿嘅電話~~~好在有資料，於是就揸去喇~~~一路行就越來越多櫻花樹出現，之後經過一個地方，好似係軍人嘅俱樂部。嘩~~~入面都有唔少嘅櫻花樹 ! 但係呢~~~我哋入唔到去呀~~~正當想揸車走人嘅時間，係一Ｄ橫街到發現咗一Ｄ櫻花路，呢一段路應該係民居嘅路，但係就成條到種滿櫻花樹~~~好鬼死靚架 ! Ｄ櫻花俾花吹落來嘅時候重勁過先前係濟州睇到個Ｄ....嘩~~我哋睇得好開心又不停咁影相~~正 ! 之後我哋就兜去鎮海市其他地方繼續睇櫻花~~~睇完我哋就要搵地方食Lunch，基本上我哋見到有圖嘅食店就會去睇下啱唔啱食，啱嘅就會去食。今次去食呢間都幾好味，我哋叫咗個牛肉鍋(睇個樣係唔辣嘅....後來都真係唔辣 !)，呢個牛肉鍋都幾好味~~~~食完我哋又繼續我哋嘅旅程喇 !

食完個Lunch，我哋準備離開鎮海市喇，係走嘅時間，見到有一架纜車個外型幾特別，重向住個山上面行，於是我哋就去呢個地方到睇下喇。原來架纜車係會上去一個叫帝皇山公園嘅地方架 ! 呢架纜車係可以搭來回同埋單程嘅，我哋就買咗來回，每人盛惠3,000won啦 ! 買咗飛就上一層等車，原來都幾多人搭架，我哋都要等下先有得搭，其實呢架纜車我諗搭咗大約5分鐘到就到頂。上到去見到個塔，就叫做鎮海塔。參觀呢個塔都幾好，就係有Lift搭，唔洗行呀嗎 ! 去到個頂到，基本上可以睇晒全個鎮海市，不過好大風呢 ! 睇完我哋就去咗2樓嘅博物館到睇嘢，入面講咗呢個鎮海市嘅歷史同埋係鎮海市搵到嘅遺物。睇完我哋就周圍影下相，之後就等纜車搭返落去。但係其實我哋可以買單程，然後行返落去到得 ! 因為條樓梯唔係好長 (睇返資料原來都係得365級啫 !)。其實呢個鎮海市慢慢睇都可以睇成日，如果時間許可係海軍祭個段時間來睇，應該會多Ｄ嘢睇~~~~

睇完呢個鎮海市嘅櫻花，我哋就要驅車返去釜山去睇龍頭山公園同埋太宗台喇 ! 返去個段路同我哋來嘅有Ｄ唔同，個GPS個反應好遲鈍，行行下重點咗我行錯路，入咗IC路，之後我重衝咗閘添呀 ! 哈哈~~~間IC道路公司個職員叫我泊埋一邊，然後就係咁講嘢，我哋又唔知佢想點。俾錢佢又唔要喎 ! 講咗成5分鐘都唔知佢係想我哋做咩，原來佢係想我去佢哋個 Office~~~~真係~~~去到個Office諗住俾錢就算，呀~~又攪一輪，我同其中一個職員講我哋係行錯路，其實係想 U-Turn 走，最後佢哋都係唔洗我俾錢就叫我走 !! 但係我係到等佢哋唔知做咩嘅時間都有唔少人入來填Ｄ唔知咩嘢，然後就俾錢~~~我諗佢哋可能都係同我一樣都係衝咗閘 ! 之後就兜返轉頭行過，不過唔知點解要俾錢嘅呢 ? 因為我哋來嘅時候係唔洗行收費道路架，不過算喇....都係要靠GPS架喇~~~~無驚無險就到咗龍頭山公園，個GPS帶我哋去到一個停車場，於是我哋就泊車行上去個龍頭山公園喇~~~呀 ! 上到去，點解有咁多車泊咗係上面嘅~~~好似係唔洗俾錢個喎，重要係唔洗行咁多路呀嗎 ! 我懷疑呢個GPS收咗人哋錢，帶我哋去泊個要俾錢嘅停車場 !! 好啦~~~睇下呢個龍頭山公園，如果你唔上去個釜山塔到睇呢，其實就無咩特別嘢睇，都係公園一個，重有資料話有個水族館，但係我哋又唔見有喎~~~~不過就好多旅行團帶人來睇囉 ! 重見都有Ｄ韓國亞叔幫人影相添呀 !

睇完呢個龍頭山公園之後，我哋就去太宗台睇日落喇 ! 由龍頭山公園去太宗台車程唔洗30分鐘就可以去到 ! 去到嘅時候又係泊咗係門口到~~~~但係我哋行入去又唔洗收入場費個喎 ! 不過呢個太宗台到幾多斜路行，團友們話要坐園內嘅觀光小火車~~~~係呢個地方，我哋撞到一班朋友，本來原先我係同其中一Pair人來韓國玩架，不過因為溝通上面有Ｄ問題~~~~最後佢就同另外一Pair人去。我呢~~~突然間有人摟我去旅行，我咪話去韓國囉，因為我都搵咗好多資料 ! 好 ! 講返呢個太宗台先，主要係來睇日落，睇日落得兩個位可以睇到 ! 好在我哋去到嘅時候架園內觀光小火車差不多開~~~我哋就咁搭去第一個落車嘅地方就係觀景台同埋燈塔，不過呢....唔知係唔係季節嘅問題~~係觀景台都睇唔到日落嘅，燈塔更加係睇唔到喇....反而係去觀景台之前有一個位重可以睇到日落，不過個個位係無得落車個喎....我哋落車個個為一落已經係觀景台喇 ! 睇完觀景台，我哋就行去燈塔到繼續睇嘢啦~~~呢個燈塔如果可以睇到日落應該都會幾正 ! 睇完呢個燈塔我哋就繼續睇呢個太宗寺啦~~~不過呢個廟我哋去到嘅時候已經係閂咗門喇 ! 但係係個廟出面有Ｄ好似解簽嘅檔口係間寺出面，重有就係呢個有間寫住舍利子嘅建築物係到喎 !? 唔知係唔係真嘅呢 ? 係呢間廟呢個位可以睇到日落，睇落去唔錯 ! 睇完我哋就係到等園內小火車搭返去入口到 !

睇完晒Ｄ景點之後，我哋就飯東橫Inn到休息一陣就去咗附近嘅一間食店到食晚餐，係韓國~~~你想一餐唔食辣都幾難，我哋睇相點Ｄ嘢睇落去唔辣，但係呢食落就會慢慢辣出來~~~唔食得辣嘅人真係會頂唔緊 ! 食完嘢就返東橫Inn到休息喇.....今日係釜山最後一日。如果時間多Ｄ，我諗係釜山可以玩到4~5日就會啱啱好喇 ! 因為其實我哋重有好多景點都無去過~~~~釜山~~真係到此一遊咋~~~~釜山 ! 有機會我會再來過架 !係寫呢個遊記之時，睇過下其他Blog友嘅遊記，有Blog友真係去釜山玩順便去埋日本嘅福岡玩幾日，其實釜山同福岡真係幾近下架 ! 搭船都係要3個鐘就到喇~~~不過呢 ! 搭船嘅價錢都唔平喎，都要成HK$1,300到來回喎 ! 到可以考慮下 !