2009 韓國自駕之旅遊記

Day1  Day2  Day3  Day4  Day5  Day6  Day7  Day8  Day9  Day10  Day11  睇相  有用連結

WhiteScenery 民宿  > 濟州機場 > 釜山機場 > 札嘎其市場 > Toyoko Inn > 海雲台 > Toyoko Inn

今日嘅第一個行程就係搭飛機去釜山，朝早食咗個尋晚係 Lotte Mart 買嘅麵包之後就驅車前往濟州機場，我哋住間民宿去濟州機會場都要成35分鐘嘅車程同埋9點鐘就要還車，所以我哋八點鬆Ｄ就出發去機場喇~~~去機場過程都好順利，還車都好順利無咩特別問題。我哋Check-in咗就係機場都行下，其中一個團友其實想買呢個濟州嘅特產濟州柑食，但係一買就要買成箱，所以一路都無買到。去到機場睇下有無得買，點知都係要成箱咁買，所以到咗最後，呢位團友都係無買到濟州柑架 ! 架機原定係飛55分鐘~~~正常我哋應該11點鬆Ｄ就會攪掂Ｄ嘢出釜山機場，唔知咩事無神神要係空中飛多成30分鐘 ! 攪到差不多成12點先落機，攞晒Ｄ行李就去攞車。租呢程車我係網上面同呢間公司都Email來Email去成幾個星期，不過淨係得呢間租車公司有覆我。我去到個Counter到攞咗個Email出來，佢哋就攪一輪，呢間嘅職員都幾Okay ! 因為識得簡單嘅英文叫做溝通到，不過無神神問我韓國住址係邊...嘩吓~~~我咪搭佢住係 Toyoko Inn 囉 ! 點知佢哋就好似唔識咁，可能呢間 ToyokoInn係韓國比較新唔知，佢問我係唔係叫Toyoko Hotel (我後來先知另外新開嘅一間ToyokoInn係叫Toyoko Hotel係釜山Station隔離架咋 !) 又問我要唔要  GPS 啦，咦 ! 我Book個時已經話咗要架喎 ! 好唔緊要係，當然係要啦~~~之後就到俾錢喎，咦 ! 550,000won ??? 唔係喎 ! Email 覆我係 495,000won咋喎 ! 於是我就俾份Email佢哋睇，跟住佢俾個Booking 個畫面我睇，當時個價真係要成550,000won。於是我就問點解~~~心諗~~唉~~算啦 ! 鬼叫得一間選擇咩~~~又唔知個位小姐同佢坐係隔離個位小姐講咩，之後又打咗個電話 ! 哦~~~最後都係收返我495,000won，嘻嘻 ! 正 ! 之後就攞埋Ｄ行李去攞車喇~~~後來揸揸下車先記得無係機場到攞Ｄ有關釜山嘅資料添~~~個職員簡單咁講咗架車點用同埋個GPS係點用，不過呢個GPS比係濟州個個複雜咗，要入韓文去搵目的地。咁我知日本個Ｄ可以用電話號碼搵目的地，於是就問下佢有無，哦~~好在有啫 ! 本來想去鎮海市睇櫻花，因為我睇地圖應該係釜山機場去比較近，但係手頭上又無鎮海市嘅電話喎...有嘅入落去呢又無資料~~~最後就唯有去咗釜山先啦~~~~

好喇~~~個GPS叫做攪掂，咁就要開始我哋嘅釜山之旅喇 ! 本來想去鎮海市睇櫻花，但係無鎮海市嘅地標資料，所以就改去札嘎其市場啦 ! 呢個札嘎其市場其實係一個海鮮市場，點解咁出名我諗係因為有好多海鮮可以任君選擇，好似香港嘅西貢咁囉 ! 你揀完個Ｄ海鮮就可以即係煮來食 !

決定咗目的地之後呢就出發喇，呢一GPS同係濟州用個個非常之唔同，攪到我完全唔知係要向咩方向行，一開始重行錯咗人咗IC道路(IC道路就係收費道路，同日本嘅一樣)，好在Ｄ IC 道路有得俾行錯路嘅人返轉頭，如果唔係都幾大鍋 ! (所以如果真係唔係太熟呢，就靠右行，因為個Ｄ折返位通常係右手邊!) 入錯咗之後就兜返出來，一路跟住個GPS行啦，點知行行下又慢咗一步落一個路口，一路去咗另外一個IC路。今次真係要俾錢啦~~~好在 ! 都係 600won 啫 ! 呢個收費好得意架，收咗我 400won ，俾返600won我喎 ，但係個欄杆就無升起喎，原來係要自己再拋多200won入一個兜到，咁個欄就會開架喇 ! 因為我都唔知要咁做，個收錢個亞姐就係收費亭到走出來，係我手到攞咗200won，然後就拋咗入個兜到喇 ! 好鬼得意，但係我心諗，如果拋唔中呢，咁會點呀  !!

之後最終都去到札嘎其市場，但係泊係邊呢 ? 是但啦~~~就泊係街邊喇 ! 見已經過晒食Lunch時間，我哋就想搵Ｄ嘢食喎 ! 就係札嘎其市場到睇下有咩食啦，見好多海鮮當之後就有間食店，應該係揀啱想食嘅嘢就係間食店到食 ! 不過好多都無 Menu 同埋圖喎，我哋都唔知點叫嘢食 ! 行行到咗個札嘎其市場大樓樓下，我哋見到有間嘢食係樓上，好似係食Buffet咁，於是我哋就想上去睇下有咩食同埋咩價錢。正當我哋係到等緊Lift上去嘅時候，有個上咗年紀嘅男人同我哋講日文，之後我哋當然係用英文同佢講我哋唔識日文啦，佢就用簡單嘅國語同埋英文同我哋講話上面間嘢食好貴，唔抵食。重話介紹我哋去一間平Ｄ重幾抵嘅，於是我哋就跟咗佢出去喇。咦~~我哋心諗會唔會扼我哋嘅呢 ?? 警訊成日都有做呢Ｄ個喎，正當我哋係個心重係到諗緊，但係個男人重好有熱誠講嘢喎，重 Show 張 Pass 俾我哋睇係咩日文翻譯觀光導遊，我哋諗咗一陣。好 ! 就試下，於是就跟咗佢去對面嘅一棟大廈嘅6樓。係搭Lift其間同個男人傾咗幾句，原來佢係日本人，後生時係行船嘅，家下就主要係幫日本人翻譯同解決一Ｄ係韓國旅遊上嘅問題~~~而佢個辦公室就係札嘎其市場地下。好快就上到去，真係係一間餐廳，主要係有熟食同埋燒烤，可以食其中一樣又得，或者兩樣都食晒又得 ! 呢位好好先生重幫我哋攞埋位，教我哋點食，重要話一定要食有燒烤嘅 ! 嘩~~~就咁睇落去，都好多嘢食喎 ! 我哋坐低咗個位男士重擔心我哋唔識點攞嘢，重要帶我哋去攞嘢食嘅地方到話我哋知點Ｄ好食 ! 最後呢位好好先生重同我哋講有咩問題就在去搵佢幫手喎....我哋當然係話好啦~~~~之後佢就走咗啦 ! 呢間餐廳都有幾多嘢食，有海鮮，又有五花腩，重有好多蔬菜食添呀 ! 係熟食方面都唔小嘢喎，有好多韓式嘅食品同埋前菜食。呢一餐真係唔錯呀~~~價錢幾唔係貴，每人到係10,500 won 咋(即係大約HK$60多Ｄ) ! 我哋食完之後就去咗札嘎其市場到行下，係2樓到有好多食店，睇個樣都好似幾好食咁 ! 我哋一路行個Ｄ亞豬媽就不停同我哋揮手，叫我哋坐底食嘢~~~~呢個樓層除咗食嘢之外，重有Ｄ海鮮嘅乾貨買添呀~~~之後我哋影完相就走人喇....

係札嘎其到食飽睇飽之後就驅車去睇另外一個景點，就係東萊露天浸腳溫泉喇 ! 實際嘅地標~~~哦~~Sorry....無喎 !   有嘅資料就係係倫明洞站地鐵同埋釜山樂天百貨附近....我哋係樂天百貨附近兜來兜去到搵唔到，我諗都差不多搵咗成個鐘到有喇~~~同埋附近又無咩泊車嘅地方喎(我指嘅係免費嘅...)，所以最後都係放棄，返去酒店到Check-in先 ! 其實家下諗返有Ｄ蠢咗添，我哋應該泊架車係樂天百貨到，然後步行去搵呢個景點先啱，因為通常Ｄ百貨公司都係有免費泊車架嗎 !!

其實呢個景點離我哋住個到個GPS顯示呢，只係二十幾分鐘車程，但係原來釜山都幾塞車個喎。所以要成差不多三十幾分鐘先到酒店呀，去到酒店當然係泊低架車先啦~~~呢間ToyokoInn中央洞泊車係唔洗俾錢架 ! 但係網頁到呢就寫咗要架，不過泊車個到就無人看守同埋又唔洗噤掣就入得，所以應該係唔洗俾錢，到我走個日都無人要向我收錢呢~~~~

講返呢間東橫Inn中央洞先，我哋住呢間係韓國第一間嘅東橫Inn，如果你係Member的話，可以提早Book房之餘兼可以有Discount(網上訂房有30%Discount)俾住宿嘅人。我哋Discount咗之後就係40,000won一晚喇，真係好抵 ! 不過可能有Ｄ民宿重平Ｄ都唔出奇 ! 點解Book呢一間呢，其實我係想Book另外一間東橫Inn架，個間就係釜山車站隔離架咋，不過因為個間個網頁寫泊車係每10分鐘計500won，而我哋住呢一間就係每晚計 5000won，考慮到呢一點當然係要book呢一間喇。不過唔知係釜山站個間係唔係都係泊車唔洗俾錢嘅呢 ? 係就正喇 ! 同埋佢哋有得免費提供早餐，需要唔係咩早餐但係唔洗周圍搵都幾好架嗎 ! 重有重有就係諗住係呢到洗衫，因為佢哋有乾衣機。

係車到落晒Ｄ行李就去Check-in喇，如果係Member，記得攞張Member Card出來一齊做Check-in啦，因為有Discount同埋會儲分架 ! 我張Member Card係係我去北海道嘅時候申請架(都好多年喇)，家下佢哋有張新咭，舊嘅Member Card可以以優惠價換新咭(日本要500日元，韓國就係5,000won，計錢韓國換抵Ｄ)。先前佢哋個Deadline好似係31/3/2009，可能無咩人換，所以延期到31/3/2010。原來可以唔換都得架，因為我問個職員嘅時間有無呢樣嘢，之後佢同我講可以繼續用舊咭都得唔需要一定要換 ! 新咭同舊咭嘅分別就係新咭有張好似sim咭嘅嘢係到~~~當然我呢Ｄ新屎坑就會去換啦....呢次出咭好方便喎，係即場會整張咭俾你，唔係好似舊時咁寄俾你架 ! 不過張相到影得唔靚仔嘅 ! 攪好晒Ｄ嘢就上執埋Ｄ嘢上房，係我攪Check-in嘅時候，我Ｄ團友就好忙咁係到Check Email喇。Ｄ房嘅佈局都同係日本嘅一樣，唯一唔同嘅就係佢哋無提供牙刷、牙膏呢一類嘅嘢，因為韓國有條唔知咩"根據【有關資源的節約和促進循環再利用的法律實施令】，一次性商品的提供被法律所禁止。1樓櫃台銷售牙具，剃鬚刀。"，所以唔會提供呢Ｄ嘢，要嘅就係買俾你，大家要注意下，都好嘅，為地球出返一分力呀嗎。

返咗酒店，大家都係酒店到Hea咗一陣先再出發 ! 不過一Hea就成粒鐘喇~~~之後我哋就去海雲臺海水浴場到睇睇喇...去到嘅時候天都黑晒喇 ! 係呢到本來想搵個唔洗俾錢嘅位泊車，但係一路都係要俾錢嘅，後來我哋泊咗車做步兵周圍行我就發現係另外一個地方應該可以泊車唔洗俾錢啦 ! 講返呢個海雲臺海水浴場先，其實係個沙灘，係韓國沙灘就叫做浴場(我哋香港人就會覺得係沖涼嘅地方囉)。我哋去到時都黑麻麻，無咩睇，唔知日頭去會唔會有人係到游水嘅呢 ? 但係夜晚 其實都有唔少韓國人係到散步同跑步個喎 ! 呢個位置除咗有個沙灘可以睇下之外，就係有個叫釜山水族館嘅地方喇~~~不過我哋無咩興趣囉，如果有小朋友一齊去旅行的話，呢一個地方不失為一個好去處。之後我哋就一路行一路睇下附近有咩食喇~~~見到有好多海鮮食店，好似西貢咁~~~不過呢，好多間都無咩人幫襯嘅 ! 我哋更加唔敢入去啦~~~不過行到去Ｄ酒店附近就多好多食店喇~~~睇返Ｄ資料，原來可以搭船睇下附近Ｄ風景架，唔怪得我哋周圍行嘅時間，我睇到係海到有Ｄ五顏六色嘅船啦~~~

行到差不多我哋就去咗間叫 Lotteria 到食晚餐喇，呢間嘢係韓國好多地方都見到，我哋叫咗個套餐，Ｄ包都幾好味，重有Ｄ薯條都好好味，我食咗好多~~~食完就返酒店休息同埋洗衫。住東橫Inn有個好處，就係可以洗衫同埋乾埋衣 ! 係韓國呢一間重正，如果你有帶洗衣粉咁你就可以免費洗衫，因為洗衫同乾衣係唔洗俾錢就可以用架啦 ! 如果無洗衣粉，唔緊要，可以去 Reception 到買，都係300won (HK1.8) 一包就可以洗一機衫褲。東橫Inn真係好正~~~~