2009 韓國自駕之旅遊記

Day1  Day2  Day3  Day4  Day5  Day6  Day7  Day8  Day9  Day10  Day11  睇相  有用連結

WhiteScenery 民宿  > 漢拏山御里牧入段 > 濟州市政府大廈油菜花嘉年華會 > 不知明彿塔 > 萬丈窟  > Lotte Mart Dinner > WhiteScenery 民宿

好喇~~~進入第3日係濟州嘅旅程喇，亦都係係濟州最後一日喎。今日第一樣嘅就係食早餐~~~哈哈，呢個早餐其實都係韓國烏冬麵一個，但係又幾好食喎。(點解去旅行會食杯麵架 ??!!) 

我哋第一個要去嘅景點嘅行程就係係香港唔會點做嘅行山，目的地就係漢拏山，呢個山係濟州係最高，我係網上面搵資料嘅時候，唔記得係邊到睇過話去濟州無去過漢拏山就等於無去過濟州 (係咪真架 ??)。不過都唔係因為呢一句說話而去嘅，係因為想睇下Ｄ杜鵑花啫，睇Ｄ相Ｄ杜鵑花開到成個山都係好鬼死靚個喎，於是就Plan咗呢個行程喇。行漢拏山基本有4條路線可以行上山 :

1. 城板岳

全長9.6km，官方話單程行要成4.5個鐘，我有個朋友行完，真係由朝早9點行到夜晚6點架

2. 御里牧

全長4.7km，官方話單程行要成2個鐘，但係我行咗一半就走人

3. 觀音寺

全長8.7km，官方話單程行要成5個鐘，亦都係要用最多時間行嘅一段

4. 靈室

全長3.7km，官方話單程行要成1.5個鐘，係路程最短嘅一段，但係上山個段山勢險峻，多數人都會行完其他路段再揀呢條路落山

本來諗住揀靈室個段行，因為短同埋要嘅時間又唔係好多，但係睇到Ｄ資料話上山行呢一段唔係咁好行，所以退而求其次揀咗行御里牧個段。不過呢一段其實都唔係咁好行，應該係話呢到Ｄ行山徑比較崎嶇，好難行。好多段路都係由Ｄ大石整成，行得比較辛苦。係我哋行嘅時間，都有唔少韓國人都有行，有學生(唔知點解好多學生行，係唔係畢業旅行呢 ???)，重有Ｄ亞豬媽，Ｄ大叔就唔見喎...Ｄ亞豬媽呢，雙腳唔知係唔係裝咗摩打架，上山行到好似行平路咁架，真係好堅 !! Ｄ學生呢，就不停係到同我哋"我係唷""公巴娃"....見我哋唔應佢哋呢，就講"你好"，真係俾佢吹漲 !! 但係一答佢哋呢就會好開心個喎....有時佢哋係我哋身邊經過就得一個音咁問"Where do you from?" 真係好鬼攪鬼~~~我哋行下停下，行到見到遙遠地望漢拏山，但係Ｄ團友已經頂唔緊喇，所以就唔再上喇。我哋行到個個地方都重有雪，同埋又越來越大風。其實我哋只係由1000m行到去1600m咋，但係呢600m就真係行得幾甘下。之後我哋係途中食我哋準備咗嘅午餐 - 麵包，饑寒交迫嘅時候食嘅嘢真係好好味。係我哋回程嘅途中，Ｄ亞豬媽一個都唔見，可能佢哋由另外一邊行返落山都唔定~~~重有一樣嘢就係沿途都無杜鵑花睇架.......可能天氣重係凍呱 ! 不過行返落山時你都唔好話唔甘，Ｄ學生個個係到跑落去，又唔理你行咪行喎...都幾危險 ! 我哋落到山腳都差不多成一點鐘啦，坐係架車到先至感到幾攰下 ! 睇返Ｄ資料，原來如果你想上漢拏山的話，你就只可以行城板岳或者觀音寺呢兩條線去，因為個牌寫住"Area Closed"，唔知係唔係行唔到上山頂嘅呢 ?? (近年有無人用呢兩條路段上過漢拏山呢 ?有就話我知啦)

行完呢個漢拏山之後，我哋就出發去睇呢個萬丈窟~~~點知行行下，見到有Ｄ車停咗係路邊，有人係到影相喎 ! 於是我哋有停埋一邊睇下有咩可以影下啦。原來有一條八靚嘅櫻花之路係到呀~~~咪講笑，影返Ｄ先，Ｄ櫻花每逢有大車經過嘅時候就好似落雪咁飄落來~~~好鬼正  ! 之後我哋就揸車入去睇下條櫻花之路去到邊到，其實到有成差不多100m，去到個盡頭有個停車場，原來呢到就係漢拏樹木園~~~當時又係有好多學生係到，佢哋重要行出馬路影相，完成當Ｄ車無到~~~~攪到我要一路行一路"必"佢哋 !!

睇落去真係好鬼靚架~~~~~點會唔即刻影返Ｄ相先得架~~~

睇完條好靚嘅櫻花之路之後，我哋就繼續向萬丈窟前進。大約揸咗30分鐘到，我哋見到有一大塊油菜花田重有Ｄ好多攤位係一達空地到，於是我哋又揸過去睇睇喇 ! 去到附近見到有棟嘢寫咗 - 濟州市市政府大廈喎，又見到有幾個警察係到封咗條路喎，入面有Ｄ好似攤位嘅嘢，於是我就揸去另外一條路，一轉個灣，就見到成條路都泊滿晒車。於是就搵個位泊好架車之後就走去影相啦。呢次呢個油菜花田個規模重大過先前係城山日出峰見到個Ｄ~~~

我哋好興奮咁周圍影呀~~~~影呀~~~~影呀~~~~影完之後就行去一Ｄ攤檔到睇下，原來係Ｄ食嘢嘅攤檔來架，有Ｄ似嘉年華會或者花祭，因為佢哋Ｄ攤檔隔離就有好多油菜花係到架喇。我哋一路行一路睇到Ｄ嘢食好似好好味咁，頭先又只係食咗Ｄ麵包，於是就入去其中一檔到叫咗Ｄ嘢來食喇，我哋叫咗壽司卷，煎餅同埋燒豬肉食。我哋同個韓國大叔指下隔離Ｄ人食嘅嘢，點知佢呢就整咗兩條壽司卷，煎餅又整咗兩件來喎....我哋諗住過口癮試食下一條之嗎! 重有就係個碟燒豬肉，唔知點解會變咗做豬腳嘅呢~~~由於真係溝通唔到，我哋就唯有食啦~~~不過碟煎餅真係幾好味，其餘兩樣就Okay啦，但係我真係好想試下燒豬....不過食飽咗食唔落 ! 之後，我哋就係呢Ｄ攤檔到行下，行行下見都有一個攤檔買Ｄ好似"屎蟲"嘅嘢喎..."屎蟲"你哋知唔知係點架，白色一條好似鼻涕蟲嘅呢....我哋諗住影下相啫，個亞豬媽就無神神篤咗幾條俾我哋試，得我同另外一個團友試.....食呢個"屎蟲"真係好有好大勇氣，既然亞豬媽咁慷慨，我就試下喇.....唔~~~食落有Ｄ試食緊粟米咁嘅味道，有Ｄ咬口咁喇~~~不過我可以話，我自己唔會買來食囉 ! 其實除咗呢種"屎蟲"，重有一樣唔記得係咩嘅蟲~~~~點解韓國人會食Ｄ咁嘅嘢嘅呢 ? 唔通佢哋覺得好好味嘅 ?

之後行行又見到有Ｄ雞串個樣好似好好味咁喎，我哋就買咗一串來食喇，好有雞味，同埋都幾淋~~~跟住無神神有個韓國人送咗Ｄ氣球俾我哋Ｄ團友喎....奇怪 ! 然後我哋就周圍睇下喇，呢個嘉年華會或者花祭入面有好多日常用品買，重有唔少嘅食品買添~~~係出口附近重放咗Ｄ用廢鐵整成嘅物件放咗係到 !! 其實究竟呢Ｄ攤位係咩原因係到嘅呢 ? 有無知呀~~~~

都幾得意~~~~睇完晒Ｄ嘢之後我哋又再次向萬丈窟出發喇 !!

好啦~~~終於都講到萬丈窟喇.....但係其實...No...No.....

係去萬丈窟嘅旅程都去咗兩個另外嘅景點 ! 呢個景點係揸揸下車就老遠嘅地方就見到一座塔，非常之金碧輝煌。於是乎係路過嘅時候就順道入去參觀下喇，其實呢一座係彿塔來嘅，但係就唔知做咩個喎....睇睇下又有Ｄ似擺骨灰嘅地方，所以行咗一個圈我哋就走喇....

依住個攪鬼GPS到達咗萬丈窟就停架車係停車場喇喎...去到嘅時候有好多旅遊巴泊晒係到，應該係旅遊景點，所以先咁多人.....Ｄ團友因為坐咗車一段時間，要去釋放Ｄ嘢出來。於是我就係呢段時間去睇下點樣買入場卷先，點知行埋去見到好似有Ｄ唔對路喎 ! 好似係一個似係迷宮多Ｄ喎...因為我搵資料時睇過下有個叫"金寧迷路公園"係附近個喎 ! 行埋去售票處睇真Ｄ....咦~~~~真係喎....但係呢...我哋無興趣玩喎 ! 於是各團友釋放完嘢之後就繼續前往萬丈窟，呢次要人肉GPS出動先得，我睇路牌係一路直行就會到架喇....行多大約幾分鐘路程就真係到咗萬丈窟....

呢個萬丈窟資料話係由地下嘅火山熔岩溜過而形成嘅一條地下通道...通道嘅沒段就有一個由熔岩形成嘅嘢係到~~~其實呢個景點都無咩睇，一條黑漆漆嘅地下通道，同埋不時都有Ｄ水滴落來，Ｄ路都要做好行，但係都要好小心咁行先得。重有你要對Ｄ地理呀~~熔岩呀~~~好有興趣可能會睇得有興趣Ｄ。係我哋睇呢條地下通道嘅時候，都有好多日本遊客來睇，有Ｄ重著埋高跟鞋入去添呀~~~

走嘅時候我哋重係入面間超市到買咗Ｄ甜筒食添呀~~~好好味嘅呢...

嗱~~~呢個就係個不知名嘅彿塔，外邊睇落去都幾靚仔架....

睇完呢個萬丈窟之後就要去搵下今晚食Ｄ咩喇...先前係濟州市中心兜來兜去嘅時間，經過過 E-Mart 同 Lotte Mart ，通常係呢個 Mart 入面到有Ｄ Food Court可以食下嘢。於是我哋就去呢個向呢個 E-Mart 出發喇~~~去到嘅時候，有團友提意試下 Lotte Mart 嘅 Food Court 啦~~~橫掂無試過就去試下啦 ! 係 Food Court 食嘢有個好處，就係只要講號碼就可以叫嘢食，而Ｄ款式全部都有得睇~~~所以呢，你見到邊一款想食就叫邊一款食就得架啦 !!