2009 韓國自駕之旅遊記

Day1  Day2  Day3  Day4  Day5  Day6  Day7  Day8  Day9  Day10  Day11  睇相  有用連結

WhiteScenery 民宿  > Teddy Bear Museum > 濟州國際會議中心 > Museum of African Arts > 城山日出峰食堂 > 城山日出峰 > 路邊油菜花田  > 涉地可支 > E-Mart Dinner > WhiteScenery 民宿

好啦~~~去到第2日嘅行程喇~~~早餐就係食麵包，先前係超市到買嘅

之後就係係我哋住宿附近嘅景點 Teddy Bear Museum 喇，呢個景點都近架，不過個GPS呢....唉...其實唔洗5分鐘就到架喇，不過去到附近咋喎，之後要靠人肉GPS喇 !

呢個 Teddy Bear Museum有幾層，入面放咗好多以 Teddy Bear 做主題嘅嘢，呢個Museum最攪鬼嘅地方就係Ｄ Teddy Bear 會扮Ｄ出名嘅人或者事物~~~好，筆墨係形容唔到嘅，睇相啦...

原來我哋用咗成差不多3個鐘先睇完 Teddy Bear Museum ! 時間唔早，於是我哋就即刻去另外一個景點啦。就係成日係Ｄ書到見到濟州有一大達油菜花田嘅濟州國際會議中心喇 ! 點知去到~~~咦~~~點解係一大達泥地來嘅 ??? 唔通又去錯地方，唯有係附近四圍兜下喇 ! 點知都係無嘅，附近就見到有幾個地盤。可能真係變咗地盤都唔定喎~~~咁我哋就去另外一個景點啦~~~係去嘅途中，見到一間幾大下嘅建築物，原來係一間叫 Museum of African Art 嘅嘢....入去睇下如果要收錢就走人~~~果然係要收入場費，要成5,000won一個人架，我哋梗係係出面影完相就算喇 ! 之後就要去城山日出峰到食海鮮鍋同埋鮑魚粥....路程都要成個鐘架~~~係去嘅時候經過中文觀光區入面其實都幾多嘢食，本來話想搵日試下，但係最後都係無試到呢......

我哋想搵嘅地方都唔知係唔係呢道，但係眼見已經係一塊泥地啦....

食完個美味嘅海鮮鍋同鮑魚粥之後我哋就去行呢個城山日出峰，其實呢個日出峰都幾容易行，唔洗半個鐘就可以行完。唔知我哋去旅行呢一排係唔係韓國嘅畢業旅行時間呢，去到邊到都見到成大班學生~~~行下傾下一陣就行到去個頂到喇~~~不過唔知係唔係韓國Ｄ空氣都唔係咁好呢~~好大煙霞~~~之後我哋係去一個叫涉地岬地嘅地方，其實都係一個崖邊~~不過呢個崖邊就係因為拍過一輯韓劇 All-in 就出咗名喇。係去呢個涉地岬地嘅途中，我哋見到有一大遍油菜花田，於是就落車影下相喇。影影下重有兩個單車友走埋過來一齊影添呀 !! 影完呢個我哋就去咗呢個涉地岬地，其實我哋開頭都唔知係唔係呢個地方喎...因為個GPS呢~~~又失靈喇 !! 呢個地方我哋入咗去三次先揸架車入去咋，去到嘅時候都差不多黃昏喇 ! 係行去呢個涉地岬地途中會經過拍All In 個個教堂，入去參觀呢就要俾入場費啦~~~我哋都無入到去，去睇咗個涉地岬地個燈塔先，係就到燈塔之前又有一大遍油菜花田，不過無先前個幅咁靚 ! 睇完個燈塔，我哋就行返出去喇。哦~~~行返出去見到個All In 教堂買票收咗工喎，可以唔洗錢就行入去影下相喇~~~不過行入去都無嘢睇嘅 !! 之後就走人喇....返民宿同埋搵今晚嘅晚餐地方&買明天早餐 !! 係去呢個城山日出峰嘅時候，係民宿無幾遠嘅地方有一間E-Mart同埋中文區到應該有Ｄ嘢可以食，於是我哋就向呢個地方出發啦。去到E-Mart行咗一陣，買咗Ｄ嘢食。先前係網上面搵資料嘅時候見到有個網友介紹韓國有Ｄ飲品有幫助大便嘅用途，飲咗就會有得去~~~基本上我就無呢個問題，但係有團友真係有呢個問題出現咗喎....於是就買Ｄ來試下喇 ! 個樽身有個腸嘅標緻架，飲咗就無特別想去嘅感覺，但係都有得去囉 !! 團友分唔出係真係自己自然去呀，定係呢一支嘢真係有效。後來睇睇下發覺係超市出面有間食肆，Ｄ嘢睇落都唔錯，於是我哋就係呢到開埋餐喇，Ｄ嘢食都唔錯 !! 食完就返民宿休息啦~~~~