2009 韓國自駕之旅遊記 Day 1 -- fotop.net photo sharing network

2009 韓國自駕之旅遊記

Day1 Day2 Day3 Day4 Day5 Day6 Day7 Day8 Day9 Day10 Day11 睇相 有用連結

香港 > 首爾 > 濟州 > 不知名海邊 > 耽木羅石苑 > 神秘道路 > 天帝淵瀑布 > WhiteScenery 民宿

終於都玩完返來喇，11日真係過得快。如果可以留耐Ｄ重可以玩多Ｄ地方添呀 ! 今次去韓國又玩揸車，不過今次要係揸左軚車，揸慣右軚車會有好有分別，真係有驚無險~~~遲Ｄ分享下，今次去睇咗好多油菜花同櫻花，好鬼死靚 ! 食嘢就真係餐餐都有泡菜，都幾辣下....食完重會火燒後欄嘅感覺添呀 !! 好....唔講咁多，去片

4/4/2009 00:20 係香港出發去韓國仁川機場(通常都搭呢一班，因為可以直接玩落去呢)去到仁川機場比實際時間早咗成半個鐘有多，先前重擔心緊唔夠時間去轉機去金浦機場搭飛機去濟州添~~好在有咁多時間，係網上面都搵咗唔少資料係點由仁川機場去金浦機場，有搭巴士同埋 Arex ，咁我哋就選擇咗搭 Arex ，基本個程序係咁

搭 Arex 機場鐵路

海關入境 --> 去行李帶攞行李 (係攞行李附近有得唱錢) --> 攞埋行李過關 --> 通常會係 E 出口出關 --> E 出口轉左 (基本上跟住個指示行就得，一出來又有得唱錢) --> 行大約5~10分鐘到就到咗 Arex 站

之後我哋去就搭第一班車去金浦機場喇，全程需時28分鐘，因為我哋搭 Express(但係張票就寫 Commuter) ，價錢都係每人3200won(原價要成7900won，唔知係唔係無人搭，所以特價呢?!)，其實重有另外一班 Commuter ，去金浦機場都係33分鐘，票價都係3200won，但係就要停幾個站先到金浦機場。之後去到金浦機場其實都係大約六點九都未夠，所以我哋可以慢慢攪Ｄ嘢喇，搵咗個Counter寄咗Ｄ行李之後我哋係機場到等上機喇。等嘅時候成日見到Ｄ人好似追巴士咁走去等機閘到，又不停咁係到叫Ｄ人名~~~~等等下就都我哋啦...

去到濟州第一件事就係去攞車喇...先前已經係Kumhorent網上面Book咗架車，因為今次一行總共有四人，所以Book咗架Daewoo嘅SUV，等大家座得舒服Ｄ呀嗎..架車其實都幾豪華，係機場租車公司到攞車其間溝通其實都有Ｄ問題，好在有個排係我後面嘅韓國人識得英文先攪掂咋 ! 之後就會去停車場到攞車，去攞車時個職員會大家一齊Check下架車有無花痕同埋叫我還車要入滿油(呢Ｄ嘢係其他國家租車都係一樣嘅)，但係就無教我點用個GPS喎(佢哋唔係叫GPS，係叫Navigation)。唯有自己摸下點用啦，個GPS細細個但係就幾好用，以係日本用嘅GPS，應該有入電話去搵目的地呢一個function，不過要搵一段時間先搵到呢一部GPS嘅function點用~~~一開始因為揸緊右軚嘅關係，所以成日行錯線，重有就係架車個Size比平時揸開嘅有好大分別，預位方面要重新適應過，重有個GPS反應都幾遲鈍下...幾樣嘢加埋都幾苦惱....開頭重差Ｄ撞到架車添呀，架車就係韓國女人揸，但係佢同車有韓國男人凶神惡剎咁行埋來，我哋就係咁講廣東話，哦~~~個男人即刻唔同態度，呢一招係其他國家都得架....之後就要唯有慢慢揸，習慣下，但係都要第二日先叫好Ｄ，可能因為我係香港日日都有揸車嘅關係，所以要慣都要一段時間嘅呢 !

揸咗個幾鐘，都重未適應部GPS，所以成日行錯路~~~同埋都未搵到點入嘢，所以就亂咁行喇。行行下去咗一個不知道嘅海邊，返到香港睇返Ｄ資料有機會係一個叫"龍頭海岸"嘅地方。因為時間都唔早，我哋就要搵嘢食，係機場到攞咗Ｄ關於濟州嘅資料，有講下Ｄ食店嘅介紹，但係重未知點入~~~我就繼續研究部GPS，終於俾我搵到點入個電話號碼去搵地點~~~好，就試下去間食店先....最後都可以去到間食店，不過間食店附近無位泊車喎~~~咁唯有泊完Ｄ，係泊車到對住一間烤肉店。因為都幾肚餓(其實都係得11點幾咋)，於是我哋就諗住去呢一間到食啦~~~點知呢一間食店原來只係做晚市架咋 ! 我哋唯有再去搵第二間，行無耐就見到間，我哋就問下佢有無得食喇~~我哋叫哋都係手指指，叫嘅時候話唔辣，點知都係喇嘅 ! 原來韓國好多食店都有免費咖啡飲，食完之後可以自己係部咖啡機到整返杯來飲架 !

我哋食完Lunch之後，一行4人係去附近嘅一間超市買返Ｄ嘢先，間超市係頭先搵間食店時兜路經過嘅，入面基本上有齊所以嘅日用品，我哋買咗Ｄ零食同一Ｄ聽朝嘅早餐就埋單~~~嘩~~~埋單十幾廿萬真係濕濕碎~~~嘻嘻
之後就去本來想去神秘道路個喎...途經一個叫耽羅木石苑嘅地方，本來我哋都係想入去佢個解憂所方便一下架咋 ! 但係有團友話有興趣睇下，於是就入去睇下啦，揸車就有呢度好...想停就停...呢個景點要收入場費架~~~盛惠每位3000won喇....(其實都係唔洗HK$20)。呢個耽羅木石苑，主要係有一個藝術家放咗自己嘅作品係入面，每件藝術品都有意思架 ! 如果唔細心睇會覺得幾悶下~~~~
呢個景點我好似係出來第一次做嘢去旅行入過去.....但係呢....好似咋~~~
睇完個耽木羅石苑之後，就繼續我哋尋找神秘道路~~呢個神秘道路都真係幾神秘，開頭我哋唔係想去嘅時候又成日都見到Ｄ路牌寫住去神秘道路喎，但係我哋想去嘅時候呢~~~就一個牌都見唔到寫話去喎...真係好神秘呀~~~都唔知揸咗幾耐，終於都到咗喇 ! 先前係網上面搵呢個神秘道路嘅時候，有個人寫呢個神秘道路真係好神秘，神秘在係你見到佢向前斜Ｄ物件真係會向前行，向另外一邊斜就係向個邊行 !! 跟住佢就嘖嘖稱奇，真係好神秘~~~
哦~~~以我所知唔係個喎...但係我哋又係咁喎....試到同樣嘅反應喎 ! 當我哋係到疑惑緊嘅時間，有個的士司機即刻試俾我哋睇啦....當然唔關我哋事啦，係有人包車去睇景點，個司機試俾個乘客睇啫 ! 原來我哋係調轉方向，唔怪之得啦~~~終於都試到喇 ! 之後就係附近嘅一檔嘢到買咗條魚旦食，Ｄ魚旦其實係無咩味，個亞豬媽就不停咁係到講電話，好似韓劇入面個Ｄ咁一樣，大大聲咁係到唔知講咩喎 !!

玩完呢個神秘道路之後，我哋就要向今晚嘅住宿地方到出發喇。我哋住嘅地方係係濟州中文觀光區附近，叫做 White Scenery ! 係去嘅途中經過一個景點，叫天帝淵瀑布，於是我哋就去睇睇喇，呢個瀑布其實都唔係好壯觀，唔知係唔係少水嘅關係呢~~~睇落去好普通呢 !! 不過都要行個喎....我哋睇完個瀑布，見到有得買菠蘿食喎，就一人買咗一支食喇，都幾好味喎 ! 呢個瀑布其實分咗三段，我哋只係睇咗兩個，另外一個重要行多最少15分鐘先到，所以我哋無行去睇 ! 之後就去咗我哋住間民宿到 Check in 喇 ! 開頭係網上面搵資料話呢一間民宿最攞命嘅就係條樓梯，果然唔野少呀~~~真係比較難行Ｄ...安頓晒Ｄ嘢之後就要搵嘢食喇，係網上面有人推介話有間食燒黑豚肉幾好味，於是我哋就驅車去食喇 ! 開頭都搵唔到~~好在有個電話號碼先至搵到咋 ! 我哋叫咗兩個五花腩肉加一個豬頸肉食，果然係五花腩肉好味Ｄ呀 !!